(خمة نفس) ــ عبدالوهاب السنجك ــ ود ادريس الشغل راجيك كثير والكاهن ختاك للبل ــ بعانخي برس

.@ ود ادريس تعرف راجيك شغل كتير.. شغل وبل زي البل يعني الكاهن لم ختاك هنا مش عشان عندك مليون شهادة جامعية ونوط جدارة من الطبقة الاولي وكواسات.. اظنوا الكاهن قعد وفكر وقدر وحسب حساباتو قالوا الزول دا قبل كدا نافس البشير زجاتو في الكرسي.. دحين البشير البنافسوا منو في الزمن داك.. المؤتمر الوطني مكنكش حالف ما يفكها لكن سبحان الله اتفك منو بقدرة قادر.. والحمد لله.
@اها اخوي ود ادريس خليك واعي وما انت اصلك قالوا منقطة مع الخواجات وتفهما طايرة كمان، بس لكن اياك وياهم.. الجماعة ديلك.. اظنهم اسع بكونوا جهزوا البدل والكرفتات والشنط وصبغة الشعر لزوم الشغل،.. ما صاحبنا عينوهو في منصب كبير ولازم نقيف معاهو اسع دا.. واخوك كان ما ساعدتو اسع تساعدوا متين.. “يعني شبير شد قام بجماعتوا ونزل بجماعتوا”
@اخونا ود ادريس انت جاي من طينة قوية والطينة دي ما ها صلصال ممكن نشكلا زي ما عايزين، بس لكن اقيف بعيد واشخط شخيط البلد عايز زردية البرهان ومنفلة الكباشي وعصاة ودالعطا ويد ود جابر ما عايزة ليها محايات ولا فكي عايزة بندقية وخمة نفس قوية
@ ودادريس اظنك عارف وكان ما عارف احسن تعرف اغلب الوزراء مكنكشين في الكرسي ومنهم عين اهلوا واولاد حلتوا والحلة البيغادي كمان، بس بشوية ما تعادي زول لانو العداوة ما سمحة تب والله بس اسحب الشريط بشوية شوية لكن ما براك، اقعد مع الكاهن وشاوروا عشان مايزعل منك لانو ما حا تقدر عليهو، هو جياشي وما عندوا غير طاااااخ.. طااااخ.
@ ود ادريس حكاية المحاصصات دي دقة قديمة الشعب طالع من حرب وانت براك عارف الزول السوداني يفهم في السياسة وراضعا من يوم ولدوهو، بس اوعاك من جملة قحاطية ولا حمدوكية ولا شيوعية ولا بعثية او حزبية.. اوزن الميزان
وخليك عادي اربط الكرفتة في رقبتك وخت رجلك فوق المراكاب ونط علي ضهر الحصان.. اعمل حسابك ما تقع لانو كان دكيك الدلنجة وبدكنا معاك ونروح في ستين داهية ، اقعد مع الناس وقول ليهم اموركَم كيف.. ودعكر والدكوة والطماطم و.. و والمدارس والعلاج.. والموية والكهربا… واهم حاجة الامن والنوم في الحوش مافي زول ينشلك ولا بقدر يسرقك..ولا يتلبد في بيتك لزوم شفشفة وكدا يعني.

@ود ادريس ما تكون قريب من القلامة والشعراء لانهم كان رادوك برفعوك فوق وكان زعلوا منك بردموك ويغطسوا حجرك.

@ود ادريس ما تنسي الولايات نضف القدح قبل ما تكب الشروبة، لانو حتكون سخنة علي الجماعة واي واحد بدخل يدو حا ينط فوق ويحلف طلاق ما يشرب شوربتك.

(خمة نفس)
المدرسة العدوية المزدوجة للاساس(بنين وبنات) انتهي الدورها بتغير غرض مربع (50)من سكني لاقتصادي وباتت بيئة المدرسة غير مؤهلة للتلاميذ.. ماذا هنالك ياوالي ولاية الجزيرة ام في قعسر السعن روااااب يامدير وزارة التربية التعليم وادارة المدرسة.
(خمة نفس)
الي مسئولي توزيع الاغاثة بمحلية ودمدني لقد فشلتم.. وفشلتم في توزيع الاغاثة بعدالة.. اغلقوا مكاتبكم وملفاتكم وقدموا استقالاتكم وكفي بالله عليكَم.