كل شئ بات غريبا، نبيع ونشتري في اي حاجة، وكل حاجة، جاي من وين ماشة وين مش معروفة..
حاج سيداحمد راجل حقاني وكلمة الحق عندو زي السيف ورصاصة عدييل ما بخاف لا من كبير ولا صغير ولا رئيس ولا وزير يرميها ليك طاااخ وكان عجبك ولا ما عجبك يقول ليك انا ما بخاف الا من الخلقني والزرعني غير الله يجي يقلعني.
حاح حمد “ابوالعريف” انت ياحاج سيداحمد شفت حمي الضنك سوت في الناس شنو، الواحد لمن تضربو ليك الحمي يبقي زي هزاز البذرة علي الطلاق فيها حمي ام برد تكسر العظام وما عندها علاج من غير البندول حبوب ولا دربات وبارك الله في ناس “اميفارما” رقدوا الحبوب هبطرش.. لكن دربات البندول ياحاج سيداحمد انقطعن من الصيدليات اليومين ديل الحاصل شنو ما عندك خبر.
… زم حاج سيداحمد شفتيه وهو ينظر بعيدا كأنه يعيد ذكريات فيلم حضر مشاهدته في دور عرض سينما الخواجة ولا كليزيوم.. ثم تحدث بصوت حزين.. انت حاج حمد كان عايز دربات بندول تلقاهن عند ستات الشاي وفي الدكاكين والدرداقات والزقاقات ما بلقاهن في الصيديلات والمستشفيات،.. كيفن الكلام دا ياحاج سيداحمد دا كلام شنو كمان..
حاج سيداحمد.. انت مابتعرف حاجة سموها تجار الازمات وطفليات الاقتصاد وهدم الموارد ياهو دا النحنا فيهو اليومين ديل.. ملاريات وحمي ضنك وناس تغش وتدس في العلاج، لو ست الشاي قبضوها تبيع في درب البندول ب (٣٥)الف جنية تاني شنو.. والصيدلاني قبضوا عندو ادوية غير مسجلة وتاجر مسكوهو بزيت طعام مغشوش وغير صالح للاكل وتجار حلفا اتقبض بعدس منتهي الصلاحية وممكن يسمم كمان والسوق اليومين ديل فيهو رز معفن.. تاني باقي لينا شنو ياحاج حمد..
.. طيب وين وزارة الصحة في مشكلة الدربات والمواصفات والمقاييس والمحلية..
اقوليك ليك ياحاج حمد…بصراحة وزارة الصحة عندها هنا في الجزيرة وبالاخص ادارة الصيدلة شغالة لكن قول لي من وين جات الادوية الغير مسجلة دي.. طبعا ديل المابخافوا الله تجار” الشنطة” اما دربات البندول حقوا نقيف هنا ونسأل كيفن وصلت لي ست الشاي ومنو المتعامل معاها..والسلسلة تجر لم نصل للرأس الكبيرَ..كان اصلو نحنا خايفين علي المواطن.
اما المواصفات والمقاييس والمحليات كل واحد شايت براهو بس ندعوا الله ان يحمع يشملهم ويسدد رميهم.
… يعني ياحاج سيداحمد الحكاية جايطة تب لكن نلمها كيف عشان نستعدلا..
.. اقوليك نلمها كيف.. مافي لم من غير القانون والمشرع لقانون ١٩٩١م كان يخت مادة الحكم في الشارع العام امام الجماهير عظة للاخرين وتخويف عديييل…ودا انا البعرفوا ياحاج حمد وما تشيل هم البلد ماشة كويس تب وكلامنا يبقي حكاية للجيل الجاي..معك سلامة انا ماشي اشوف لي رصيد عشان ارسل مصاريف للناس الضارباهم الملاريا والضنك..
حاج حمد…كلمن لكن ما يشتروا دربات البندول من ستات الشاي.. ويكتروا من البندول العادي دا ، ربنا يرفعن ويخفف عليهم. اصلوا المصيبة دي ما عندها من غير الراحة وشراب الشربات والاكل. ودعناك الله ياخوي..
(خمة نفس)
الوقوف من امام باب السلطان له عدة استفهامات.. اعوذ بالله
(خمة نفس)
لماذا توقفت حملات التفتيش والمداهمات وازالة تشوهات السكن العشوائي بالولاية وبالاخص ودمدني.. لعل المانع خير.
