
حاج سيداحمد بلغ من العمر عتيا وبلغ من الخبرات التراكمية مالم يبلغه احدا في هذا الوقت الغابر، ما قبل استقلال السودان كان يعرف اين يضع رجله فهو ذو فطرة وذكاء خارقة وعين فاصحة، قرأ لما نحن فيه الان من اعياء وألم َحسرة وغلاء طاحن من الرأس حتي الساس.
حكومات تجي وتفوت وانقلاب يأكل انقلاب وحاج سيداحمد ممسك بالصبر..
@.. اها جماعة في شنو كمان تاني، الاغاثة طارت طيرة ودابرك من عشو ولحق الصح وامات طه، تسجلوا الناس عشان شنو ما كفاية الفات ما قلنا مات دفناهو دفنه ماهو قايم منها الا يوم البحث.
@..ياحاج انت ماتصبر شوية وتدينا عدد ناس البيت كم عشان نخصص ليكم ناموسيات من الملاريا وحمي الضنك.
@..اول حاجة انتو منو وجايين من وين
@..نحنا موظفين من الخرطوم ناس منظمة تقول كدا يعني وشغال ليكم.
@..شغالين نحنا انتوا قايلين البلد دي قاعدة” ام فكو”ساااكت ما فيها رجال عشان تشتغلوا لينا انتوا..
@..عارفين فيها رجال لكن دا تخصصنا لعشان الحميات جابين ناموسيات بس انت ادينا اسمك وعدد اسرتك
@..حَرم كضابين مابقدروا علي الجزيرة دي لان الناس الفيها اكتر من سته مليون زول وزوله وانتوا عندكم كم ناموسية.
@..قالوا لينا الجزيرة عندها اكثر من الف وستمية ناموسية
@..ما قلت ليكم ما بتقدروا كضب سااااكت @..ياحاج سيداحمد نحنا ماشين ورانا شغل
@..حرم ماتمشوا سجلوا…ام الحسين وام الحسن وفاطنة بت الحرم ونفيسة بت مقبول.. ديل حريمي وعندي منهم اربعين بين رجال وصبي وصبية عندكم كلام معاي.. بس النسوان الاربعة ديل كان جبتوا ليهن ناموسيات بدخلن اولادن كلهم معاهن انا خلونا تحت شجرة النيم دي اصلو حاح حمد ابو العريف الحلة دي كلها اولادوا..من الخور للحواشة.
@..مع سلامة ياحاج حتصلك الناموسية
@..قال ناموسية قال.. نحنا البلد دي خابرنها كويس ما في حاجة ماشة صااااح، الانجليز نظموها واولادنا خربوها.
…..َاليوم الثاني من التسجيل..
@٠٠اجري ياحاج سيداحمد في شنو في الحلة كمان.. اسمك ندهو لكن لمن لقوك مافي شطبوك. والعميان شايل المكسر.. ناموسية واحدة بس.
@..بالله انا ما قلت ليهم مابتقدروا علي الكلام دا وناس الجزيرة كتار ما تلعبوا عليهم.. لكن الفيكم اتعرفت تب وحرم تاني واحد يجيني الا بعكازي دا اكسر كرعيهو.. امشوا بالا لمة معاك ناموسية تاخدكم مع باعوضتكم وضنكم، هم عايزيني اقيف قدامن واشحدن ناموسية.. حرم انا بقولا في سري ما الله كريم زي ما ادي الحكومة بديني انا كمان..لكن خلاص انتهت حصتكم وجرس الحصة ضرب امشوا اهلكم بالا ناموسيات بلا كلام فارغ معاكم.. حاجة ما قادرين عليها تسوها ليه..عذبتوا الناس معاكم، كفاية كضب معاكم.
(خمة نفس)
وحدة ري لمشروع الجزيرة.. “تجربة سابقة” هل تم تحليل ودراسة الامر بعانية والجلوس مع كل الاطراف حتي لا يقع الفشل…الري رمز سيادي ومثل هذه القرارات تضعف من مكانته العلمية والعملية..ادركو الامر قبل فوات الاوان ياسادة.