نقطة.. (1)
الاتحاد الأوروبي وما تناقلتة بعض الوسائط.. سقط.. سقطة ما بعدها ولا قبلها.. سجلها التاريخ.. ولن يستطيع كائن من كان محوها.. قال البراؤون وقال الزعيم المجاهد السوداني القح الطيب جودة.. بالله عليكم اختشوا، ود جودة قاعد في حواشتوا وحلتوا بين أهلوا وعشيرتوا.. المليشيا المتمردة دخلت الجزيرة يعني حا يحارب بسيقان العدسية ولا القطن ما لازم يجهز نفسو وأهلوا ويقيف مع الجيش للقتال.. و نجح.. وانتوا يا الخواجات وعملاء السفارات.. موتوا موتكم ساااااكت.. السودان كلوا جيش، والزعيم ودجودة قاعد فوق قلبكم.. تعالوا كان تقدروا.
(نقطة.. 2)
والي ولاية القضارف الفريق م. أحمد محمد احمد حسن رمي الكرة في ملعب ولاة الولايات.. سلة رمضان مجانية للعاملين بالقضارف”لا قرش ولا تعريفة” نشوف الباقين حا يعملوا شنو… ما دا تحدي عديييل ياولاة الولايات.. ونقول الوالي القضارف ان شاء الله في ميزان حسناتكم.
نقطة.. (3)
غابة امبارونا المنتجع السياحي المهمل تبع منو مش معروف.. الولاية.. الثقافة والإعلام إدارة السياحة.. حماية الحياة البرية.. الغابات.. وزارة الزراعة.. محلية ودمدني الكبري..
اخونا د. عبدالرحمن عيسى نضم وكتب وكورك عديل وبعد حا يتمرد عدييل ويدخل الغابة، لانو ما في جهة قالت ليهو مالك يادكتور.. قال ليكم الغابة بقت مكب للاوساخ والنفايات “كل النفايات افهموها ياناس بالله عليكم” ولا حياة لمن تنادي… صم.. بكم.. مغمضي الأعين.
نقطة.. (4)
نبارك لقواتنا المسلحة والمشتركة، والبرؤؤن، والصياد، والكيكلاب، والعمل الخاص وكل الذين يقاتلون دفعا عن الوطن الانتصارات.. الدلنج دخلت الضل.. وكاودا قريبة بإذن الله تعالى.. تمشوا وين الغريق لي قدام.. ارجوا الراجيكم.
نقطة.. (5)
بالامس نفذت محكمة الجنايات العامة في ولاية الجزيرة (وسط السودان) تحت إشراف مولانا جامع على يوسف قاضي المحكمة العامة وحضور مولانا كمال محمد احمد في الموقع، وحراسة افراد الشرطة القضائية عملية إبادة لاكثر من (5200) قندول حشيش بنقو رقما وعدا،..نقول مبروك..
..وعلي الأسر مراقبة أبنائهم، مشروع الاستهداف كبير فلابد من الانتباه..والانتباه.
(خمة نفس)
انتخابات مهن الإنتاج الزراعي والحيواني لمشروع الجزيرة… ما بين المد والجذب.. الاتهام والانتصار.. شكاوى هنا وهناك..أمانة حكومة الولاية يستقبل مجموعة، ومسيد ازرق طيبة يرحب بآخرين..في شنو يا ملح الأرض.. صندوق الانتخابات هو الفيصل،” الغاية تبرر الوسيلة”
