(خمة نفس) ــ عبدالوهاب السنجك ــ البتحني للشبال ما بغطي وشو ــ بعانخي برس

حكايتنا طويلة وما اظنها تنتهي باخوي واخوك، حتي لو قعدونا الاجاويد في الواطة دي.

@ليه ياحاج سيداحمد انت متشائم كدا ما تقول خير وتخت الرحمن في قلبك..

@والله ياحاج علي انا عارف البير وغطاها لكن لافضل فيها بير ولا غطا بس نقول الله يستر علي البلد دي ما اصلها ماشة دفره.

@كيفين كلامك دا ياحاج سيداحمد.

@كلامي عديل مافيهو لف ولا دوران وانتوا خليكم في حالكم دا من مافات الانجليز وانتوا تتشاكلوا علي الكرسي كل واحد يقول انا احسن من التاني لمن ضيعتوا البلد وعايزة تقع علي راسها من طولا

@ كدي ياحاج سيداحمد انا شايف ابوالعريف هبوبوا ماشة قداموا واسع حا يورينا اخبار الحكومة الجديدة شكلوها كيف لانو ما عندنا كهرباء وما عارفين البلد فيها شنو..

@هو ياحاج علي ابو العريف ذاتو ما عارف حاجة من غير نقل الكلام الما ليهو طعم وطوالي خامي نفسو في الناس وزي ناس ابو العريف ديل حقوا ما نسمع ليهم اي نضم تب.

@طيب اسكت يا سيداحمد زولك وصل وخشمو يفرفر يظهر عندو نضم كتير.

@..ابوالعريف السلام عليكم ياجماعة..

@حبابك وحباب الناس الشياله هم البلد اهااا اخبار الحكومة شنو؟؟

@ والله الحكومة شغالين فيها شكلو الزول “كامل” عامل خطوات تنظيم وما عايز يمشي الطابور اسع. وممكن يومين تلاتة تاني ويفك اخروو، لكن انت ياحاج علي حاج سيداحمد ماسك خشمو مالو عليهو شايفوا مهموم بلحيل.

@والله يا حاج حمد (ابوالعريف) ..حاج سيداحمد بقول نحن من فاتوا الانجليز ما ضقنا راحة في الدنيا دي كلنا جاريين ورااا الكرسي عشان كدا البلد ما ماشة لي قدام.

@طيب نعمل شنو ياحاج علي ما سوها فينا وفاتوا.. اولاد الميرغني لعبوا بينا واسع عندهم واحد قحاطي عديل.. واولاد المهدي بتهم مريم الكانت وزير خارجية في حكومة حمدوك الفاشلة مع القحاطة .وكمان عندهم العسكري داك كراع برا وكراع جوا ومبارك ختها عديل كان لقي طريقة يمسح البلد دي مسح.
اما الشيوعيين ديل خلاص ما عندهم حاجة تاني واحزاب الفكة صموا انتهوا..الشعب قال الكاهن بس ومافي من غير الجيش.. بل زي البل.

@حاج سيداحمد.. اها ياحاج حمد.. ناس كرتي ونافع وهارون يعني ” حزب المؤتمر الوطني” ديل وين من الرصة.

@ ديل ياحاج سيداحمد ماسكين الشعرة من الطرف زي شعرة معاوية بن سفيان مع ناس الكوفة (يشدو ويرخو) واقول ليك ممكن يكونوا مدورين البلد دي كمان.

@حاج علي.. كيف يعني ياحاج حمد هو” البتحنى للشبال بغطي وشو”.. ما يقولوا نحنا قاعدين عدييل ومدورنها كمان

@حاج سيداحمد.. كيفن يعني ديل تاني ماليهم رجعة تلاتين سنة ونحنا راجعين لي وراا.. كدي نشوف جكت كامل دا ممكن يكون جايينا بطرح سياسي جديد لا مع اليمين ولا مع اليسار.

@حاج علي.. والله نشوف البحصل شنو لي قدام بعد ما الجيش ينطف البلد دي من مليشيا ال دقلو الارهابية ما اصلو عدونا ما بخلينا في حالنا.
ورئيس الوزراء كامل ادريس حيتعب شديد في تشكيل الحكومة. يعني لا مناوي برضي كان زحوهو لي وراا، ولا جبريل بسكت كمان.

@يعني بي كلامك دا يا حاج حمد حنكون علي كدا ساقيتنا مدورة لي متين..

@حاج حمد (ابوالعريف) مش معروف..

@حاج سيداحمد.. انا ماقلت ليك ياحاج علي حاج حمد دا كلامو ما فيهو فايدة لا بودي ولا بجيب.

@ ما دام كلامي لا بودي ولا بجيب سوطوو واخلطووا انتوا اصلو البلد الناس فيها بقوا كلهم سياسيين، تطير السياسة ويطير يومااا مع سلامة

@اقيف ما تمشي ياحاج حمد.. كدي ورينا خبر الولاة بعد تشكيل الحكومة.

@عايزين تعرفوا..بكرة حتعرفوا.. انتظرونا في المحطة الجاية بس.

(خمة نفس)
قرار امين امانة حكومة ولاية الجزيرة الخاص بعودة العاملين لمقرات العمل 6/20.. هل سيبطق فعلا ام حبر علي ورق.

(خمة نفس)
تشيد دكاكين جديدة عدد (2) علي سور المدرسة الشرقية من الجهة الشرقية.. الحكاية شنو ياوزارة التربية والتعليم ادارة العقارات الحكاية “ركوب راس”