@تصدق يافردة امبارح الدنيا عايزة تنقلب علينا في الحلة.
# كيفن يعني تنقلب عليكم!!!
@ قالوا التمساح كبس الحلة بالليل وناس الحلة طلعوا من البيوت وجرى “دنقاس” على الحواشات، وناس الحلة الفوقانية جوهم فازعين الشايل طورية والشايل عكاز.
#وبعدين!!
@ تصدق طلع كلوا كذبة إشاعة ساااكت لانو حلتنا مأمنة تماما لا قدامه بحر ولا وراه بحر.. سماها صافية لبن..مافي حاجة لا بتجينا من فوق ولا من تحت…
# طيب مالكم مخوفين الناس. َ!!
@ ما قلت ليك دي الإشاعة، واحد يفكها ليك وبسرعة أتطايرت وكل واحد كب عليها كوز زيادة.
# طيب نعمل شنو!! عشان نوعي الناس،ما نحنا عايزين حاجة عن الإشاعة.. والخبر الكاذب.
@هاك ياسيد واقول ليك للإشاعة لها أساليب وتقنيات تستخدم لنشر المعلومات أو الأفكار أو الأخبار بطريقة غير رسمية أو غير موثقة، غالبًا ما تكون هدفها البلبلة والتأثير على المجتمعات والرأي العام
يعني زي تمساح حلتكم الطلع اشاعة يتكرر مرة ومرتين وينتشر ويبقي أكثر مصداقية.
ومصدر الإشاعة يكون غير معروف أو مجهول لإضافة مصداقية للاشاعة لجعلها أكثر أهمية أو خطورة.
وكمان في حاجة تانية ودي منها تغيير الحقائق أو المعلومات لتتناسب مع المطلوب للوصول لزعزعة الناس وماتنسي انو العواطف لجعل الناس يقبلون خبر الإشاعة دون تفكير
وكمان هنا نلقي استخدام وسائل التواصل الاجتماعي”الهواتف” تساعد وبسرعة لنشر المعلومة… وناس ما قالوا قاعدين في ضل الحيطة.. شغالين” قالوا وما قالوا” .. ومرات يتم نشر خبر كاذب عن شخص مشهور ” رجل دين_ رئيس دولة _فنان_لاعب كرة” لخلق بلبلة مقصودة. واستخدام صور أو فيديوهات مفبركة يعد من ضروب الإشاعة الضارة ودي بقت منتشرة شديد بين اليومين ديل.
# طيب ياسيد عايز افهم نتعامل كيف مع الإشاعة!!
@ اول حاجة التأكد من مصداقية المصدر قبل تصديق الخبر والمعلومة وفتش عن أدلة أو مصادر أخرى عشان تعرف الحقيقة.. مش يقول ليكم تمساح تخلو البلد وانتوا ما ساكنين جنب البحر وسماكم طيرة مافيهو، وكمان خلونا من العواطف
وفكروا بعقل ومنطق عشان ما تقعوا في خبر الإشاعة الكاذب الاصلوا الهدف منو البلبلة وزعزعة البلد، واحسن الزول قبل ماينشر الخبر والمعلومة حتى التأكد منها لانو بتخلق عدم استقرار لي ناس البلد كلهم..
#طيب الزول الفكة الإشاعة لو عرفناه نعمل ليهو شنو!
@ القانون واضح وصريح المواد (66-67-68) يعاقب بها مروج الخبر الكاذب وفيها السجن والغرامة كمان. وقانون المعلوماتية تصل! العقوبة فيهو (10)سنوات عدييل..
# شكرا ليك كلام سمح بالحيل والله… الله يكفينا شر الكذب و الإشاعة الضارة.
(خمة نفس)
الإشاعة احيانا تقتل وتزهق أرواح وتعطل مؤسسات…انتبهوا.. انتبهوا هنالك من يتربص بنا.. وهو يبث الإشاعة في الولايات الآمنة لزعزعتها لخلق البلبلة مابين مواطنيها.
(خمة نفس)
… تبا وتبا الذين يبثوا الإشاعة والأخبار الكاذبة
(شعب واحد.. جيش واحد)
