الشاعر صديق أحمد يوسف يكتب
عيونك لما تتكلم
يبوحن بي كلام مبهم !!
وما بفهم!
يقولوا شنو؟
بحاول افهم.
أكان اقدر!!!
عيونك مرة تتبسم
ومرة كمان بتتلعثم
ومرة اشوف
دموع مخفية مسجونه
تدور تطلع
وما بتطلع
تداريها وتخفيها
تحت بسمة
بسمة حزينة شايلة الهم
واسمع ضحكة رنانة
وأقيف اسمع
كمان اطرب
ويرقص قلبي بي فرحة
وارجع تاني لي عيونك
عشان افهم
بقولوا شنو؟؟
وفي كل مرة ما بفهم
وتطلع دمعة حزنانه
واتلعثم
وامد ايدي
وامسح ليك دموع الهم
واغسل ليك دمعاتك
أكان اقدر!!!!
وارجع تاني لي عيونك
افتش فيها لي فرحا
يزيل همك
وترجعي لي زي اول
تشيلي الهم
وتملي الدنيا بي فرحك
واعيش سعدك
وانسى الهم
***********
