سمعت تسجيل لإحدى السودانيات مقيمه بالخارج تعتزر عبر تسجيل صوتي وهي تبكي لاهلها وتقول ليهم
أنا ما بقدر اجيبكم كلكم معاي هنا
من السودان لانو ماعندي إمكانية.
و..
وقبل فترة أحدهم عبر الفيديو يتكلم بلغة مكسورة ..محبطه ..كئيبه
يتخللها حزن عميق بقول لأهله … اعزرونا ..
قالها كدا
نحن بنعتزر لي ناس والله العظيم حالهم بقي مابسرنا
بضرب ليك تنحرج ما تعرف تقول شنو
ناس ماحصل ضربت ليهم او ضربو ليك فى حوجه
اهل وأقارب ومعارف
…
كانو اعزاء في قومهم
اذلتهم تلك الحرب
فأخرجو قسرا بعدما اجبرهم الظرف علي ذلك
شردو وتعطلت مصالحهم
وأصبحو بين يوم وليله لايملكون شيئا
نائمين علي احدي المحطات او الخيام المؤقته في ولايات امنه مؤقتاً ايضا ..
من استطاع الخروج ببعض ماله
او سيارة قد يبيعها ولو بأبخس الأثمان
لينجو هو وأسرته
من الجحيم.
حقيقة ان الجميع أصبح يعاني
الداخل والخارج من السودان.
عشان كدا ما تزعل او تتضايق
لو في زول من اهلك بره كان بفقدك قبل الحرب وبتفقدو
وبعد الحرب طنشك.
ماتزعل لو اتواصل معاك حتي..بدون ما يسألك من وضعك
كيف ولا محتاج حاجه !!
لالا
ماتزعل لأنك مابتعرف ظروفهم شنو
معظم المغتربين الان اصبحو يعيلون اسر ممتده
بعدما كان الواحد منهم برسل لي امه او ابوه واخوانه.
الان الوضع مختلف
زمان كان العقد الإجتماعي يجبره بأن يساهم فى الحفاظ على الحد الادني للحياه لي اسرتو واعمامو وعماتو وخالتو وخيلانو واولاد حبوبة بت عم ابوه وبت خالة ود عمة امه …كمجاملات
ياخ لو زول عيا ساي من الأسرة
تلقي ابوك او امك مرسلين ليك دايرين حق المساهمه
عشان يشيلها ابوك او امك
ويمشو يزورو اخوها او خالها او عم ابوك او اخوه
ويدوهم ظرف نهاية الزيارة
واحد والديك يقول بفخر لا تنقصه الذكر في اوقات الشدة واليسر
دي مساهمه ولدي فلان
..
الان الوضع اختلف
المسأله بقت إجبارية
انت ماعارف نفسك فى قائمة الاولايات حقت المغترب رقم كم
لو كنت عارف مع دائرة الضغط البكون فيها ممكن تسقط سهوا او اجباراً
من باب اولي لك فأولي
..
رقمك يعني للمغترب التزامه انو يوفر ليك ما يساعدك ان تعيش شهر شهرين
يوم..او يومين
دي حقيقه خلونا نعترف بيها جميعاً
فماااا تزعلو عليكم الله
اقول هذا الكلام لأنى قادر احس بمعاناة شريحه كبيره من الشباب والشابات ومقتبلي العمر
وهبو نفسهم لخدمة اسرهم من زماااااان
قبل الحرب حتي
كان وقتها المغتربون يحملون العبء الأكبر في تحمل نفاقات الكثير من الأسر السودانيه.
ومطالبين بي انو يوفقو اوضاعهم
فى معادلة صعبه..
تخليك تفكر تحاول
كيف تكون حياتك و..كيف تحافظ علي حياة أسرتك في نفس الوقت ..
وتتضائل الفرصه انك تكون حياتك
قصاد التزاماتك البتذيد كل يوم لحدى ماتصل لمرحلة انك تديييين من صديق قريب منك علي الراتب.!!
عشان راتبك مابكفيك تنجد ابوك وامك واخوانك
فمابالك انو الموضوع يتوسع وتنضغطك انت اكثر ..فأكثر
ياااه
اشتغلت انت بالساعات وسهرت في ورديات
عشان توفر حق العلاج
وحق الاكل
وحق الجامعه
وتجهيز العرس
لاخواتك البنات
وعلي العليك
جات فوق دا في راسك
حرب
وموت وتشريد
اسر واطفال
شيوخ ومرضي مسنين
دفعت بأحدهم ان يقطع من لحمه لكي يوفر حق فيزا
وحق التذاكر والسفر والاقامه والزيارة او او او
فالمسالة اصبحت من اللحم واليه
حتي وصلت مرحلة تكسير العظام بعد ما فات جوووه اللحم الحي ذاتو..
المغترب الوحيد الذي يتأثر بشكل مختلف تفسيرا المثل البقول ليك.
كتلوك ولا جوك جووك
يلا المغترب ياهو ذاتو جوك جوووك
…
يشعر
ويعاني
ويقتل وهو حي
وتغتال أحلامه
وتغتصب افكاره امامه
وهو لايعلم ماذا سيفعل.
بعيدا هناك
….
صديقة لي حاولت أن تتواصل مع أهلها في مدنى واستعانت بي وخزلتها للأسف لنفس السبب
هذا المشترك لايمكن الوصول اليه حالياً.
اصابتها حالة من الاحباط في ظل الحالة المستمرة من الانقطاع الكامل من التواصل معهم
ولم تتوفق في ذلك.. حال الكثير من المتواجدين خارج السودان
قالت لي
أنا حأحجز للسودان وجايه لاهلي فى مدني اطلعهم.!!
هل رأيتم مثل هذا الحب من قبل!!
المهم
عليكم الله ماتزعلو من زول في الظروف دي…ظروف وبتعدي
