اللهم اعد لنا امننا وسلامنا وابتسامنا….
حاجة المهلة دى من سنار،ما جارتنا قريب بس بتجينا زى مرتين فى الاسبوع…تحوم الحلة كلها تشكي من راجلا …السكران ..
الحيران المودر قروشو فى السكر وقلة الفكر وخالينا بلا مصاريف…وكل مرة امى تقول ليها ادعى ليه بالهداية.. . تقوم تقول ..يهد حيلو ان شاءالله المايل المتهايل…
مرة جاتنا وكانت على غير العادة هادئة . وجات صباحا بدرى …فطرت وهى بتشرب فى القهوة جا ولدا الصغير جاري..(يمة…يمة..ابوى ودوه الحراسة. قبضو العسكري. قال فى مرة جات اشتكت قالت سرق قروشا)…
بس حاجة المهلة كانت بااردة تشرب فى قهوتا قالت ليه ان شاءالله ما يمرق منها..الكومر شالو؟ اريتو بي شيلة ابوى الما رجع منها.
امى قالت ليها عيب يا مهلة امشي شوفى مالو برضو ابو عيالك ..
قالت لامى ..اشوف ليه شنو يشوف العمي.. وبراحة كدة قالت لامي انا عارفة كل شى.
طبعا امي اندهشت طوالى هى عدلت رقدتا وقالت لامى..
الليلة صرف المرتبات. شفته قام دغشا بدري ..باريته من غير يحس بي..لغاية ما وصل لى قطية كدة دخل وانا بقيت بعاين بي رقراق الصريف..شفت مرة طويلة كدى ..ناولا الماهية مشت ختتا فى علبة وغزتا فى قش القطية وناولتو المريسة.. ومرقت….انا طوالى لفيت بي غادي..براحة شلت العلبة فتحتها وشلت القروش ورجعتها ..دى عيشتنا انا واولادى خليهم يسجنوه ..هو يرتاح ونحن كمان نرتاح..
