الطيب عبدالماجد يكتب ..( هدنة ) ود بحر أبيض…وساحر النيلين ( التجاني حاج موسى ) ( بشكي ليكم يا مظاليم الهوى ) _ بعانخي برس

( هدنة )

ود بحر أبيض…وساحر النيلين

( التجاني حاج موسى )

( بشكي ليكم يا مظاليم الهوى )

(التجاني حاج موسى ) هذا الأنيس الونيس ..!!
أخذ من النيل الابيض بياض النية وتدفق الحنية …!!
لتدفع ( الدويم ) ب ( راس حربه ) صريح وتقدم لنا واحداً من أبنائها ( المبروكين ) …!!

و ( الدويم ) مدينه حتى إذا لم تراها ….!! تحسها …
( طاعمة زي ( جِبنتا )……ومثقفة زي ( بختها )
وبختنا ب ( التجاني ) ود ( دار السلام )
ولادة الرضا …!!
و ( بخت الرضا )

( ويا مطمناني بطمنك )

( التجاني حاج موسى ) لما تشوفو بتشوف السودان
…..بجمال أخلاقو … ولطافتو وضحكتو
وروحو السمحة ..😍

شاعر بالميلاد …وموهوب بالتخصص …وود بلد
كتب أحلى القصائد وخط أجمل الأغنيات
🎶
( و دا الجاني منك ومن تباريح الهوى
وصفو بصعب يا جميل ) 🎶

( إستلما ) سلطان الطرب ( محمد ميرغني ) بي سدرو
وداها ( ليفيل ) تاني …

عمل مدرساً ومربياً في المدارس …..!!
بمسك ( المايك ) بذات الجمال البمسك بيهو ( الطبشيرة)

( وفي الاتنين ( معلم ) ….!!🫶
🎶
وتبقى سيرتك هي الكلام
وتبقى صورتك هى الرؤى الحلوة البعيشا
في صحوتي أو حتى في عز المنام
🎶
( عاين التجاني دا ( بدفق ) كيف ) 🥰

( التجاني حاج موسى ) بتحس بيهو بكتب من جوه
لذلك تأتي أشعاره مليانة إحساس…و ( معبية ) ريد .👌!!

وبشكي ليكَ ما مظاليم الهوى
إمكن ألقى الزَّيي فيكم ضاق جراح الحب واتعذب كتير.

جاء من ( الدويم ) المتخمة بالمعرفة واستقر في ( العباسية ) المكتنزة بالمشاعر …
وقد سكنها نفر من المبدعين ( الطوال )
وعلى تخومها كان لقاءه مع العندليب زيدان ابراهيم ( وكلاهما مرهف ) 💞
فكانت علاقة روح ومحبة …أنتجت اعمالاً مشتركة
سعد بها السودانيون …
فبني ( التجاني ) ل ( زيدان ) قصراً من الشوق لكن العباسية كانت لهما بيتاً من الأماني
🎶
ويا قصر الشوق لو هداك�حبيبك ومره ليك صدا�ببنيك بي بغلاوة الريد�محال أنا قصري يتهدا

( فكان لقاء الضفاف …بين التجاني وأبو الزيك )

وزيدان قيثارة الطرب وعبقرية الأداء وصدق المعاني ..
عندما تتأمل تعابير وجهه وهو يغني ….تشعر بأنه يواسي نفسه قبل الآخرين ويأخذ من روحه ليعطي ….

وعندما تتعثر الكلمات وتتبعثر في أفواه المحبين
يستلف أحدهم
( إذا الخاطر سرح منك …تأكد إنو راح ليكا ) 💞
ويحولها لمحبوبته. … ( بنكك )
( يخليها بين السما والواطة ) …..!!
والكاش ( فراش ) 🥰
( تصلح بضم الفاء وفتحها )

كتبها التجاني بحروف الأماني وزيدان وداها عالم تاني

ووجدت ثالثهم الذي علمهم ( الحب ) ( عمر الشاعر ) الذي دوزن هذا اللحن ( الفسيح ) و( باصاهو ) ( بيني ) للعندليب الذي لعبها ( بالمقاس ) فاستقرت في سقف مرمى العاشقين

وقد جمعتهم الروح والألحان ……!! التجاني والعباسية
🎶
ويا المخلوق بلون الطيف
اوصف فيك اوصف كيف ؟

( التجاني بالغ ….والاغنية مكتوبه بي حب ) 🫶

واستمر الديربي بين الاتنين والجمهور ( المنتشي ) يتابع اللقاء

أما لقاءات ( التجاني ) و( ترباس ) فكانت ( مفتوحة )
ومترعة بالجمال …عبر أغنيات لامست الناس بشكل ( كثيف )
🎶
وجاي تفتش الماضي ….خلاص الماضي ولى زمان🎷

فاصبحت ( بريد ) كل معذب من ضنين الوعد وهزات التجافي ….!!💔
🎶
وكل ما تزيدني في هجرك
أقول ليك زيدني ما أحلاك🙏

ويلتقيان من جديد في الأغنية ذائعة الصيت أمي الله يسلمك لينتقل ( التجاني ) بأمه ( دار السلام ) من ( الدويم ) إلى كل ارجاء المعمورة وبدون ( فيزا ) …!!
حيث تلقاها السودانيون في الداخل والخارج وكانت مرسال شوق وعطر محبة ….
وأصبحت ( السلام الجمهوري ) الذي يعزف على أقدام الأمهات ..شوقاً ولوعة وحنين
🫶🫶 🥰
ويا حصنى لو جار الزمان
ختيتى فى قلبى اليقين
يا مطمنانى بطمنك
الله يسلمك 🤲

ليتفوق ( التجاني ) على نفسه ويكتب ( واحشني )
للقديس ( عركي )
في لقاء شفاف ( بز ) فيه ( ود الدويم ) أماسي العاصمة الوردية بمفردات ( ملونة )
ورفع ايقاع العواطف حد ( الوله ) 🥰🫶
وكانت أغنية من كوكب آخر
🎶
( ووالله أحكام يا مسافة.. ويااااا سفر ) ..!!🎷

وأبو عركي ( مترف ) ….
عندنا يغني للوطن ( قلبك بدق ) …..!!❤️ وعندما يغني للزمن ( نبضك بدق ) …..!! وعندما يغني للحبيبه …..
( لاتعرف تدخل لا تعرف تمرق ) …😇
🎶
( و إلا باكر لما ترجع
أنا بحكى ليك عن الحصل ) 🙌

وإذا لم يكتب ( التجاني ود دار السلام ) غيرها …لجلس مع الكبار …!!
وعركي غناها من روحه …!!

ولان الرجل مسكون بالإبداع..وموهوب بالفطرة
فهو كما النيل ….لا يمكنك ان تتنبأ متى سيفيض …
ولا تستطيع التكهن بمتى سيمارس السكون …..لكنه يظل جاريا …

فأهدانا ( في عز الليل ) أغنيه ( هامسة ) استجم في مرافئها الناس …ومنحتهم سكينة وجلال ..!🥰

فكانت واحة وسط اليباب و ( نفاج ) في عز العتمة
🫶🫶🫶🫶
وفي عز الليل ساعة النسمة ترتاح علي هدب الدغش وتنوم أنا مساهر ..

فلعب ( كابلي ) في ملعبه حيث الهدوء والعمق والرصانة
وقدمها لنا أكثر مما أراد ( التجاني ) متحاوزاً سقف أمنياته
ولحنا براهو …

وكابلي فنان المحبين وملهمهم …..عندما يغني بحسو إنو بغني ليهم هم بس ….فينفجر شلالًا رويا …..!!

( وجرحك ياغرام الروح لا طاب لابدور يبرى )؟🎶
متين يبرى …

وذات الأغنية غناها ( النور الجيلاني ) بلحن مختلف
ولمًا سألو ( كابلي ) عن ما فعله ( طرزان ) ..
أثنى علي اللحن والأداء وقال عز الليل ( محظوظة ) لأنها أتاحت الفرصة لمحبي غنائي وغناء النور الجيلاني من الإستمتاع باللحنين ….!!

( وهذا تعقيب لايقدر عليه سوى كابلي ) …..!!
والذي يتحدث كما يغني 🙌

وكانت كلمات تتجلى فيها شاعرية ( التجاني )،وتتمايل فيها مفرداته ..!!
وبراك عارف وبي أدري…💞

ليؤكد ود حاج موسي علو كعبه ويلتقي مع ( البلابل )
لقاء الأوفياء في حبايبنا .. قرايبنا وبخاصمونا …
وخصامكم لما زاد طول … 🎶

و( البلابل ) تنقلن بين الضفاف وحلقن بجناح ( عزة ) في سماء هذا البلد وملأن الفضاء تغريداً ونشيد

ولما عيونكم الحلوات تعاتبنا …
ونرجع نحن مجبورين نسامحكم …
حبايبنا 🙏🥰
( شوف التجاني دا رقيق كيف )

لحنا ( بتهوفن ) الحلفايا ( بشير عباس ) بالكتلوج
و ( بنات طلسم ) ( إتجدعن ) فيها …!!

فرد السودانيون التحيه بأحسن منها وحكموا عليهن بالحب 💞 مع سبق الاصرار و ( التصنت ) …!!
حباً بحب وودا بود والبادي ( اجمل ) 🌹

وأحبو ( التجاني ) الدرويش المثقف والسوداني القح
وأخو الأخوان…..
عندما ألتقي ( التجاني ) في اي محفل نتبادل السمر والحكايا …!!
( شلال من الضحك وفاصل من الونس الجميل ) 🥰
وكنا نزوره من وقت لآخر أنا والعزيز شكر الله خلف الله
نسمع الشعر والرواية …وونستو زي شعرو

إتصلت به قبل فترة قريبة مطمئناً فوجدت ذات الصوت
وذات الحضور مع ( رنة ) حزن خفيفة اخفق في إخفائها

حاولت أغير الموضوع قلت ليهو ما تكتب لينا حاجه
( فرح ) كدا ….!!🥰
قال لي لكن أجيبو من وين حتى العصافير الكانت بتجي في شجرتي ديك …واستدرك ….( بتتذكرا ) يالطيب
تاني ما جات ….!!😥
لمن تجي بكتب …. !!

لما حسا بي سكتا كدا ….
حكى لي ( نكتة ) ( مت من الضحك ) هو طبعاُ حكاي
شديد ولما يحكي بحاكي 😂😂

وياهو دا ( التجاني ) دنيا من الفرح وعالم من الأماني….وشاعر كل الناس …!!
وتبقى سيرتك هي الكلام ويبقى إسمك هو الغنا 🙌🫶

ستعود عصافيرك يا ( تجاني ) ….وستكتب القصيدة
ساعة النسمة ترتاح علي هدب الدغش وتنوم

لاتسمح للدنيا والظروف أن تسرق ضحكتك الحلوة وروحك
النقية …فنحن ننتظرك على مرافئ الحروف وبوابات القوافي …وعودة العصافير

وإلا باكر لما ترجع
أنا بحكى ليك عن الحصل ،…!!!

وعد ..!! 🙏