عفاف عدنان
الرسول عليكم…..انا نضامة……………..؟!
جائت لزيارة أمى الحاجة مكة لتشكو لها (نسوان الحلة الفوق )..فقالت والله يا حاجة إنتى ما طالبانى حليفة ما عملت ليهن شى…بس هن ساكت ما دايراتنى اعاشرن…(كجنة ) ساكت…فسألتها أمى عن مشكلتها مع حاجة مريم فقالت (اها.. ما انا زاتی جاياك عشان كدى…كل واحدة ادور أحكى ليها تقول لى نضمك كتير…المشكلة كلها بس الصندوق قالت لى اتاخرتى ما جبتى القريشات…قلت اوريها السبب ..قامت خلتنى فى محلى داك وابت تسمع قالت لى نضميك كتير..اها النحكى ليك وانت قولى النصيحة…اليوم داك كان جمعة…لا استغفر الله ما جمعة عشان يوم الجمعة ولدى بمشى الصلاة مع ابوهو فى الجامع ..واليوم داك كان قاعد وكان داير (أم فتفت ) فى الفطور…كان يوم سبت…مشيت السوق عندى قروش عند حاج النقر النجار شال منى مية جنيه عشان يسوى لى الرف فى المطبخ…اصلو العدة كانت طوالى تقع ولما جبتو قال لى الرف لازم يكون عريض ومن يوما شال القروش وما جا ..وقلت اشيلن منو لصندوق الختة…وما لقيت لى مواصلات إلا بعد ساعة…ومشيت لقيت معاهو جماعة نضيفين وجلاليب بيضا ..سألت الولد الشغال معاهو قال لى ماشين لى فاتحة ود السرة…قلت ليهو الرسول هو كبر وبقى للعرس …ما شاء الله. .اها كنت بقول فى شنو? اى..دخلت شلت القروش وانا راجعة اتذكرت فطور الوليد لفيت على الجزارة…لقيت ود الخليفة عندو ديك يا اللحمة اشتريت منو كيلو وشلت منو .(أم فتفت ) ومشيت على الحاجات شلت الدكوة ..وكمان فضلة خيرك…شلت لى سلطة سمحة بالحيل من الفحل. وبعد داك رجيت الحافلة اتاخرت قلت للكمسارى(خباركم الليلة متاخرين؟) قال لى عشان الكبرى اتكسر…تصدقى البنوهو قريب داك…و انا راجعة شفت لمة فى بيت سعدية ..مشيت اسال قالوا ابوهم رجع…نان ما طول الناس رجعوا بدرى من الحج قالو كان فى الخرطوم بتعالج…دخلت حمدت ليها السلامة ..ولقيت عندها ناسا كتار
بالحيل…اتغديت …فضلة خيرك…و لما رجعت البيت ارتحت شوية ومشيت على حاجة مريم قالت لى خلاص دخلنا شامة بدلك…لما درت اشرح ليها قالت لى ما عندى ليك زمن….إنتى نضميك كتير…اها يا حاجة فى شهادتك… االنبى عليك…انا نضامة…؟!..)
