.. شجرة حاج سيداحمد الوريفة تجمع القاشي والماشي، مافي زول متقدم ولا متأخر الا تلقاهو عند تحت شجرة حاج سيداحمد.. الكلام السمح والاجاويد والعرس والطهور وناس فلان وفلانه…والحكومة قالت.. وقالت.. سياسة مغطية ومفتوحة من النص.
@..حاج حمد “ابوالعريف” زول نضم جاي مهبب وشايل التراب تحت كرعينو..
@٠٠ تعرفوا ياجماعة الليلة الحكومة شالت الضباط جت.. جت.. ما خلت ولا واحد فيهم وانتوا عارفين ياحاج سيداحمد الكلااام دا غلط كبير.. دا ما وقتوا لانهم كانوا شغالين بل زي البل.. في المليشيا المتمردة دي.
@.. طيب ياحاج حمد انت بتعرف شنو عن الجيش وهو نحنا بس ما نسمع لينا كلام الا نقوم جارين بيهو وشغالين نضم وشمارات، ما اصلو الجيش كل فترة بقدم ناس وبنزل ناس وكلهم قدر المسئولية ما اقل من اخوانن النزلوهم،
@..لكن ياحاج سيداحمد دا ما وقتو
@٠٠طيب ياسيد الوقت البحددوا منو ياحاج حمد نحنا القاعدين من غير النضم ما عندنا حاجة، ما اصلو جماعة الواتساب والفيس شغالين نقل وتخيلات ساااكت وقالوا وقالوا وانت عارف ياحاج الموضوع ملعوب من برا البلد يعني الحرب بقت حرب اعلام واشاعات عشان الناس ما تعرف تعمل شنو.
@٠٠طيب ياحاج سيداحمد في كلام الولاة شايلنهم برضوا وعايزين يعينوا بدلن ولاة من الجيش ممكن يكونوا النزلوهم ديل.
@٠٠ ونحنا دخلنا شنو في الكلااام دا ياحاج.. ما اصلك انت زي” ابولكلكة عمدة بلاحلة”
@٠٠يعني ياحاج سيداحمد ما عندي راي وكلااام.
@..كلااام شنو العندك تاني.. دا كان زمان لمن البلد كانت زي الهبابة مليانة احزاب، لكن اسع راحوا فيها لا حزب ابوي ولا حزب جدي ابو امي، الشيوعيين بقوا
قحطاويين والقحطاويين شيوعيين، قاعدين براا البلد شغالين ضدنا.. لكن نحنا جيش قوقو بس.. والما عاجبوا يمشي يقع البحر.
@٠٠والله دا كلااام يا حاج سيداحمد خلاص يعني لا جلابية مقلوبة ولا ام رقبة ولا شنطة تمكنا ولا… ولا..
@٠٠ايوة لا.. ولا.. كان عجبكم ولا ما عجبكم.. كاكي اخضر.. حكومة اخضر في اخضر
الجيش قاعد..ورامي قداام ما بخلي في البلد داعمي تاني وشغال براا وجواا، شغال بي فهموا واحسن الناس تبطل اشاعات.. فلان ليه شالوهو وفلان ليه جابوهو..
@٠٠طيب ياحاج انت اسع بتقول الولاة قاعدين لكن مافي دخان من دون نار.
@.. القالو منو مافي نار من دون دخان اسع الغاز الغالي المافي دااا فيهو دخان مانار بس….ما تستعجلوا سااااكت وتملوا البلد كلااام ما ليهو طعم.. الجيش مخير يشيلوا منو ويخلي منو…والحكومة ليها الحق كمان تعفي منو من الولاة وتخلي منو هي عارفة بتسوي في شنو لكن الناس مابتريح ولابتصبر.. ما اصلو نحن شعب سياسية والغطس حجرنا غير السياسة شنو..
@٠٠والله ياحاج سيداحمد الليلة كلامك حار شديد احسن امشي اشوف شغلتي معاك سلااامة ياحاج
@٠٠امشي ودعناك الله بس خليك في حالك البلد ما ناقصة اشاعات وكلاااام قالوا.. ما قالوا…وقلنا.
(خمة نفس)
“أبو كلكلة عمدة بلا حلة” هو مثل سوداني يُستخدم لوصف شخص يتصرف كأنه صاحب سلطة أو ملكية دون أن يكون له الحق في ذلك.
وهو ما نحن فيه الان.. عايزين وما عايزين.
