.. سأل الشيخ ماذا لديكم الان!!
صمت قليلا مطأطا رآسه ثم نطق قائلا”ما عصايا معوجة من فوق وخلاص” ثم مضي مهرولا وهو يصيح”ياناس هوي الزول ماراح، الزول ماراح من اول يوم.. قولوا لي كيفن راح.. راح لمن جات الفارهات سيرة عدييل..
وقالوا ليهو خلاص استلم ودور بينا البلد داك نحرق الجازلين البابور دا..
.. يعني ياشيخنا ما قالوا ليهو” ربنا يعينك”
.. قالوها من تحت تحت ما كتامي لكن.
آها انت رايك شنو ياشيخنا في الحاصل دااا..
.. كلامي انااا حار عليكم لانو حيكون صراخ في واد الصمت.. لانكم وما حا تسمعوا والتجارب قدامكم كتيره
فات والي جاكم والي.. الفات ثبت والجاي شتت الوالي قام الوالي قعد.. والساقية مدورة..
.. طيب ياشيخنا قرار اقالة والي الجزيرة كلامك فيهو شنو!!
… عادي جدا لكن دااا ما وقتواا، لانو البلد في حالة غير طبيعية.. بس الزول ارتاح من المشاكل وارتفاع السكري والضغط.. ووجع الركب من الجري الكتير.
.. وتاني ياشيخنا بنسألك قرار اقالة امين امانة الحكومة دا كيف!!
..دا المشكلة ذاتا والسؤال ضرب في المليان تمام .. ما اصلوا امين الحكومة هو سكرتير الوالي وعارف البئر وغطاها ومدور الملفات.. ملف اَلمرتبات والمعاشات والتأمين الصحي و الصحة والمدارس والنازحين ودعم الجيش و.. و..لكن الزول صعب التعامل ومتقلب المزاج، وقرار وزارة الحكم الاتحادي حيخلل الولاية ويهزها هز يعني القرار ما اصاب الهدف ابدا.. بندق في بحر
.. كيفن ياشخينا بندق في بحر!!
.. آقول ليكم كيفن الوالي الطاهر حيدخل علي الجبل بي فاس يعني لمن يفتح الملفات دي ويعرفها عايز ليهو ليالي وايام وشهور وانتوا عارفين المواطن معصور والوقت دا هو حقيقة عصر المواطن عصر لمن جاب الزيت.
.. يعني ياشخينا من كلامك دا قرار اقالة امين الحكومة غلط…
..غلط وتاني غلط.
.. ليه غلط ياشيخنا غلط وانت زعلان مالك!!
.. انا مازعلان ولاعندي مصلحة في الحكومة ولا امين الحكومة ما انا مواطن وعايز البلد والولاية تمشي عدييل لكن لمن تشيل وتخت من دون فهم تعمل ربكة ولخبطة، الزول كان يخلوهو لمن يسلم الملفات ويكتب خطاب التسليم والتسلم مابين الوالي السابق أسماعيل والمكلف الطاهر ويقعد يفند الملفات واحد واحد وبعداك ناس الحكم الاتحادي معاهم الحق والراي،لكن بالطريقة دي الحكاية فيها ريحة ما كويسة وراها حكاية.
…ياشيخنا شايفين الضباط الاداريين منتشين وفرحانين كمان بتعيين واحد منهم والي.
.. معاهم حق كل زول بفرح لي زولوا.. بس نخاف من الشللية والسيطرة والكنكشة وخم الرماد.
.. تاني ياشيخنا حتقول لينا شنو!!
…اقول ليكم خمواا نفسكم سااااكت الجاي اصعب واخاف من الجماعة ينطوا فوق ويلعبوا شليل وينوا اكلوا الدودو.. شيل دا وخت داا وجيب دااك والولاية تدور عكس الساعة.
(خمة نفس)
للوالي الطاهر هدئ السرعة امامك متاريس ومطبات.
(خمة نفس)
الوقوف ومساندة القوات المسلحة السودانية والامن ومرتبات العاملين هي من اولويات المرحلة فالمشوار طويل ويبدأ بخطوة.. ياااحكومة الجزيرة.
