(خمة نفس) _ عبدالوهاب السنجك _ برنامج الغذاء العالمي يوريا لمزارعي القمح.. أهااا كيف؟! _ بعانخي برس
بعانخي برس
محافظ مشروع الجزيرة يعلن عن وصول 50 ألف جوال يوريا عبر برنامج الغذاء العالمي لمخازن مارنجان منحة لمزارعي القمح بالمشروع.
المهندس إسماعيل عبدالمحسن نائب مدير الإدارة الزراعية لأقسام الجزيرة، والأستاذ حسن مضوي المدير التنفيذي لمكتب المحافظ يشهدان وصول الشاحنات لمخازن مارنجان، وذلك بحضور مسؤولي برنامج الغذاء العالمي ومفوضية العون الإنساني ووحدة الأمن الاقتصادي بالمشروع..
هااا كيف؟!
نقيف هنا.. الجماعة قدموا لينا هدية كبيرة وعظيمة لكن؟!
عايز تقول شنو كمان!!
أقول عديل: الموسم الصيفي راح عديل وشلنا اللوم على الخريف والمطر وعينا الفيل ضعنا في ضلو..
مشروع طويل عريض زي مشروع الجزيرة، شيخ المشاريع، ينتظر منحة 50 ألف جوال يوريا؟! معليش نشكر برنامج الغذاء العالمي، كتر خيرهم، لكن السؤال البوجع: وين كان تحضيرنا نحن؟!
وهل جاهزين للموسم الشتوي وزراعة القمح.. ولا برضو حا نمد يدينا للخارج وننتظر الاغاثة.
هسع المهم.. اليوريا وصلت،
بس كيف نوزعها من غير شكاوي؟!
زمان اليوريا بتتوزع في الظلام، وناس تشيل وناس ما تلقى، وناس تبيعها في السوق الأسود قبل ما تصل الغيط.. وتسمع الشكاوي: فلان شال وفلان ما شال، وفلان عندو واسطة..
طبعا الجماعة الياهم قاعدين منتظرين الوليمة الجاهزة..
المرة دي دايرين شفافية عديل.. ومافي اي لعب خارج الميدان.
اول حاجة كشف بالأسماء عديل يتلصق في مكاتب التفاتيش.. أي مزارع عندو حواشة مزروعة قمح ياخد حصتو كاملة دون نقصان مع المراقبة كمان.
ثانياً.. التوزيع عبر الجمعيات والغيط مباشرة، ما من المخازن ولا المكاتب المغلقة.
ثالثاً.. لجنة من المزارعين ذاتهم تكون حاضرة مع الأمن الاقتصادي.. المزارع يحرس حق المزارع.. “منهم وفيهم”
50 ألف جوال ما كتيرة على مشروع الجزيرة ، لكن لو اتوزعت صاح بتشجع المزارع يزرع، ولو اتلعب فيها تاني ودخلت السوق بنفقد الثقة نهائي!!
السماد وصل.. فهل تصل الأمانة معاهو؟!
خمة نفس أخيرة:
نشكر الخواجات الجابو اليوريا.. لكن متين نشكر روحنا ونجهز سمادنا برانا؟!
ولا كل موسم نستنى المنحة؟!
.. نقول الكرة في ملعب جمعيات مهن الإنتاج الزراعي والحيواني،. ولازم من التفكير الصاح كان داخل الصندوق ولا خارج الصندوق.
منتظرين النتائج ما عايزين تصريحات وكلام يشيلوا الهواء..
كفاية علينا والله.
