نقطة (1)
..الحكاية شنو ياوزارة التربية والتعليم في ولاية الجزيرة وإدارة مرحلة قبل الابتدائي (رياض الأطفال) منو المسئول من التصاديق، بس معقول كل يوم نلقى روضة في شارع أو زنقة.. بيت أو عمارة.. فسحة ساكت مافي.. يعني الأطفال ديل من بيت أهلهم لبيت ماما “ست الروضة” طبعا مافي اي مواصفات وقياس من غير لافتة كبيرة عريضة ملونه وخلاص.. َهوي يا إدارات التعليم ما تسووا الغلط وبعدين تقولوا معليش كان في خطأ غير مقصود.
نقطة (2)
سألنا بطريقة مؤدبة شوية…انتوا الرواكيب في نص السوق دي حقت منو.. قالوا لينا دي الأرض حقت زول ونحنا مؤجرين في اليوم (5) الف جنية وهو يشوف شغلتوا مع ناس المحلية..
اهاااا دا كلام ياجماعة.. كدي قولوا لينا دحين الكلام داا صاح…المشتري من الأراضي كان ما قادر يبني القطعة يرفع يدوا وبسعر اليوم.. شوفوا شغلكم ياناس الأراضي.. الرواكيب دي ما مظهر حضاري ابدا.. ماتتفرجوا وبعدين لمن يقع الفأس في الرأس…
نقطة (3)
قرار مدير عام وزارة التربية والتعليم الوزير المكلف بولاية الجزيرة رقم (261) لسنة 2025م الخاص لمنع تسجيل أي طالب وطالبة لامتحانات الشهادة الثانوية من مدرسة لأخرى غير المدرسة التي درس فيها.. الخ..
ختاها عدييل بعد كدااا.. تاني مافي فك مراقبة ليكم.. ولا إجابة لامتحان على السبورة.. بس كان يعمل حاجة…كان يستعين بصديق لمراقبة الامتحانات.. ناس الهدف.. الخلية الأمنية.. القوات الخاصة….حتقول لي مش معقول.. اقوليك.. انضباط.. رقابة.. طهر.. حفاظا على سمعتنا.. ونتيجة الامتحانات.
نقطة (4)
ولاية الجزيرة نفضت غبار الحرب اللعينة التي فرضت على وطن وشعب مسالم، وتحررت بالرجال الأقوياء الأوفياء،
وان كان الراهن الاقتصادي كان صعبا غير أنها أنجزت (6117)الف مشروع خدمي في عدة أشهر..
يقولوا ليك ما شفنا منهن حاجة.. نقول ليكم…الموية عندك كآبة.. والكهرباء مولعة والأمن مستتب.. والمستشفيات والأطباء موجودين… والبصل والطماطم والدكوة وقدر الفول مدورة.. تاني يعملوا ليك شنو… اصبر شوية.. السمح جاي قدام جاي ما تشفق ساااااكت.
نقطة..(5)
َعلي حسب المتابعة..نجد ديوان الحكم المحلي بالولاية في حركة ماكوكية متواصلة.. متابعة لكل مايدور في محليات الولاية.. أ. نهى عمر ابراهيم امين ديوان الحكم المحلي حركت الساكن.. وطبعا المتابعة دي ما حا ترضى الجماعة.. لكن لكم بشعرة معاوية بن سفيان واهلة الكوفة في العراق.. وبس… حا يرقدوا رز تاني..
………
(خمة نفس)
حادثة تفجير القرنيت والعربة الاكسنت في شارع النيل بودمدني.. يجب الوقوف عندها طويلا لإعادة ترتيب وتنظيم الصفوف، حمل السلاح في قلب الأسواق والجلوس في المقاهي ومع ستات الشاي مظهر غير مقبول.. نحترم الجميع بالجميع نؤمن الوطن من كيد الأعداء والخونة…. شعب واحد جيش واحد.
