الطيب عبدالماجد يكتب ..هدنة ( عطر الكلام وسحر القوافي ) سيف الدين الدسوقي ( والوعد بيناتنا إنك كل يوم تكتب إليا) ✍️ بعانخي برس

هدنة

( عطر الكلام وسحر القوافي )

سيف الدين الدسوقي

( والوعد بيناتنا إنك كل يوم تكتب إليا) ✍️

إنه ( أمير ) حي العرب وود ( أم درمان ) بالميلاد والتجنس والتبني والتمني …!!
لذلك منحته سرها …و( أدتو الأمان )

فكان ( سيف الدين الدسوقي ) شاعر يحاكي القمر ….
وقلم ساطع …..و ( حبر ) كحبات المطر 💦

لا أدري لماذا أتخيل دائماً أن ( الدسوقي ) عندما يهم بكتابة
قصيدة فهو يكتبها بمداد الروح وبوح المشاعر ….ويرسمها بريشة فنان وشاعر ..🥰

فقصائده تنضح عذوبه …وتكتنز مودة …!!

و ( لذيذة ) …!!

كتب بالعربي و ( الأفرنجي ) و الدراجي …وفي كل ( تمطى ) ….!!

( سيف ) دا لوكتب ب ( اللاتيني ) لوصلنا إحساسه ) ….

وياحبيبي ليس عندي غير هذي الذكريات�عن هوانا ولقاءنا في الليالي الماضيات�ويح قلبي ضاع أمسي في تضاعيف الحياة�ياحبيبي ليس بعد الهجر إلا الاغنيات 🥰

( ماقلت ليكم )

الدسوقي شاعر مثقف ومطلع وموهوب
نشأ في أسرة دينية متصوفة وقد كان والده كذلك وقد درس العربية ونهل من الصحافة وأتقن الانجليزية …
فكان هذا ( الإحساس ) من ذاك ( الأستاذ)

له قصائد ودواوين تنضح بالجمال وتسطع بالبريق
لكن لقاءته ( الوديه ) مع بعض الفنانين الكبار جعلته يقترب أكثر من الوجدان السوداني بأغنيات حية …وكلمات نواضر ..

فكان لقاءه ( المحضور ) مع الحنين ( الجابري ) في ( رسايل )

و ( أحمد الجابري ) فنان دافئ واستثنائي….
الأغنية بتبكي عندو حتى تجف الدموع
لذلك لما يغنيها بتعذب الناس 🥹

فصوته ملائكي ( مليان شجن ) …وإحساسه مرهف …
( كلو شوق ) 😍
تعامد مع الدسوقي …فسالت الأشواق جداول ..!
🎼
ومافي حتي رساله واحده وبيها اتصبر شوية
والوعد بيناتنا إنك كل يوم تكنب اليا ..
🎼

( غايتو جنس شجن ) 😍

فكانت هذه الاغنية أنيسة ( المغتربين ) وسلوى ( المعذبين ) ….وتبكي بس

فعبر الجابري والدسوقي عن لوعة الفراق وأدب الهجران …!!
وسافرت كل الارجاء تواسي هذا …!! 🤌 وتداعب تلك وفي الحالتين أنا الضايع …!!
تعبر المحبطات وتبث اللوعة …وتبل الشوق ..

وهل يجوز والغربة حارة بالخطاب تبخل علىّ؟

( جهجهتو الأمة ياخ )

( الدسوقي ) جدد في الشعر الرومانسي …لانه مزج بين الثقافة والشعور الشعبي فكان راقياً في طرحة .. صادقاً في إحساسه فوصل لكل الناس…!!

ليلتقي مع ( الذري ) إبراهيم عوض ….في ( المصير )
و ( إبراهيم عوض ) من حي العرب ايضاً

( زلزال وضرب الحي ) …😳

شوف ( أمدرمان ) دي …..!!
بي ( حي واحد ) بتلعب كاس العالم ..🙌

وكانت واحده من الأغنيات السودانيه المجيدة والمهيبة …..و الملهمة ..!!
🎼
وتانى ما تقول إنتهينا …..تنهى جيل ينظر الينا
نحن قلب الدنيا ديه ….ونحن عز الدنيا بينا
تانى ما تقول إنتهينا …..نحن يا داب إبتدينا
🎼
أغنيه قدر ما تسمعا …بتديك طاقة …وتملاك أمل
وهي نتيجة طبيعيه طالما السايقنها …
( إبراهيم عوض ) و( سيف الدين الدسوقي )

( الفورمولا 1)✌️
🎼
ونحن فى الأيام بقينا
قصة ما بتعرف نهاية
ابتدت ريدة ومحبة واصبحت فى ذاتا غاية
كنت تمنحنى السعادة ولىا تتفجر عطايا
ولما أغرق فى دموعى
تبكى من قلبك معايا 🙏😭

( الحقونا ياناس ( سيف ) طلع من جفيرو )

وقد لحنها ( المجرم ) ( ود الحاوي) فزادها حلاوة على طلاوتها …!!

( وهو ( الحاوي ) الوحيد الدين اقنعنا في السودان )

الدسوقي تشعر به يمتلئ حيويه وعنفوان ويظهر ذلك في حروفه المتقدة …وإحساسه المتقدم ..ومشاعره الجياشة

والعجب لما يقرا شعره بصوته …!!
( يأسرك ساعتها )
فيتداخل الأداء مع الكلمة والصوت ….وما عليك وقتها إلا أن تربط الحزام ….!! وتستعد للإقلاع
( لأنو بطير بيك ) ….

ياخ دا لما يقرا ( عد بي الي النيل ) …!!

( لا بتعرف النيل جاييك …..ولا إنت ماشي ليهو ) 😇

حيث يأخذنا الي هناك حيث براحات الوطن الفسيح
بكل كبريائه والبهاء …وفي عيون الناس 😍

والناس في وطني شوق يهدهدهم
كما يهز نسيم قامة القصب
والجار يعشق للجيران من سبب
وقد يحبهم جدًا بلا سبب
الناس أروع ما فيهم بساطتهم
لكن معدنهم أغلى من الذهب 😍

ما شفت الناس يالدسوقي ….مجروحين شديد …!!😥
ولو كنت حاضراً …لانفطر قلبك الرقيق .💔

وعد بي إلى النيل لا تسأل عن التعب …!!

( يسمع منك الله )

ولي في الديار ديارٌ كلما طرفت عيني
يرف ضياها في دجى هُدبي
وذكرياتُ أحبائي إذا خطرتْ
احسُّ بالموجِ فوقَ البحرِ يلعب بي

( جنس لعب هو ياسيف )
تعال شوف براك ) 😭 …!!

وكان لقاءه مع كروان الأغنية الشعبية
( محمد احمد عوض ) باهياً ومشرقاً ومنير ….
و محمد احمد فنان كبير … مختلف وطروب
التقي مع الدسوقي في أكثر من مناسبة وفي كل لقاء قصة
🎼
ورغم ﺑﻌﺪﻱ ﺑﺮﺳﻞ ﺳﻼﻣﻲ
ﻳﺤﻮﻱ ﺷﻮﻗﻲ ﻭﻛﻞ ﺇﺣﺘﺮﺍﻡ
🎼
فتسلطن فيها وأبدع
فعالجه الدسوقي بأخرى ….فكانت أغنيات للزمن
🎼
وعندي كلمة أحب أقولا
عن مصيري وعن مصيرك
إيه كسبتي بعد فراقي
والألم عذب ضميرك
🎼
وكلاهما قد تغني بهما ( المدهش ) ( محمود عبدالعزيز ) من بعده …
و ( الحوت ) هو الفنان الوحيد الذي لو غنى لآخر فهو يضفي على الأغنية من روحه ويمنحها من إحساسه ويطوعها ( بزمانه ) وكيفما شاء …..
حنى تحتار أيهما كإن الأفضل ( الأصل أم ( التجديد ) …!!؟

وقد نقلها الى أجيال اخرى لم تحظى برؤية ( العوض )
وكانت أغنيات بعطر فنان وتوقيع ( الجان )

( رحلوا كلهم …وبقيت كلمة ) …😥

و مالقيتي بلاي سعادة ****ما قدرت أحن لغيرك

نضم ( الدسوقي ) و ( محمد أحمد ) غنى
والحوت ( يوززززززع )

ويظل ( سيف الدين الدسوقي ) علامة مضيئة في سفرنا الإبداعي وحرف حي …
مثل السودان في كثير من المحافل وكان صوتاً سودانيا مقنعاً ومثقفاً ومديد ….!!

إستضافته المهرجانات العربية واحتفت به فكان سفيراً
محلقاً للأدب والثقافة السودانية شكلاً وموضوع
بزيه الانيق وصوته الرقيق ..
وكانت (يازمن الأفراح الوردية ) أيقونة احتفى بها الذواقة في كل مكان

وممنوع يا سمراء لأن الحب هناك جنون�وأنا مجنون تعرفنى كل الأشعار �يعرفنى الليل المسدل سترته�وشقاء الفن وكل نهار�لا أحسن أن أبقى من غير الحب�والحب حرام فى الصحراء�وأنا يا أنت……أيا سمراء 🙏�
ليرتقي شاعرنا ويركب السحاب في لقاءه ( المبهر ) مع
( بنات طلسم ) في ( مشوار )
والتي تفوق فيها على نفسه…وغنتها البلابل بمزاج ….فكانت أغنيه للتاريخ

والبلابل غردن فملأن السودان بهجة وطرب …وشوق ..
والسودانيين ديل لو دقو ليك تأشيرة دخول تاني
( إنقلاب ) ما بطلعك ….
وقد ختم الناس على ( جوازهن ) بالرضا والقبول 🕹️

وكان اللقاء الراقي مع ساحر ( حي العرب ) في هذه الأغنية ( الباهرة ) وقد لحنها ( العبقري ) بشير عباس فحلقت البلابل بجناحي الدسوقي وبشير هذه المره في رحلة نحو النجوم …!!

وبتعرف إني من أجلك ….
مشيت مشوار سنين وسنين

مشيت في الليل إلى الغربة
على الكلمات ودمع العين

وعشتك لما فارقتك حروف تتغنى بيك حنين

بتعرف؟ ؟؟؟
إنت ما بتعرف ….!!!

أنحن بي حبكم هايمين

ودارت دورة الأيام ونحن مع الزمن أغراب
متين تتحقق اللقيا ومتين يتجمعوا الأحباب

( نقول شنو هسا ) …!!
( والصمت في حرم الجمال ( جمال )

ويأبى الدسوقي الا ان يلتقي مع ( المبهج ) سيد خليفة
وقد لايعرف الكثيرون ان اغنية ( أودعكم ) هذه الأغنية
العجيبة التي تجمع بين الشجن والحزن والفرح في تلاقي نادر لايقدر عليه الا سيف وسيد …
فكانت بمثابة النشيد ( الشعبي ) لكل مودع
ينوي الرحيل …

ونزرع ريد
وعالم كلو حب وسلام
لكم آه
وآه بتزود الآلام
اودعكم لا…افارقكم لا
لالا ما بقدر
وتبقى عشرة الأيام 🥰
أودع …أودع….أودع
كيف ..!!

وقد فعلتها يا ( سيف ) وتركت إرثا من جمال وأخذتنا معك إلى ( عوالم ) باهية وعصور زاهيات …
وكنت أحد فرسان الكلمة الذين نستدعيهم كلما
زادت علينا الهموم وتكالبت عينا الدنيا وأرهقتنا الظنون
فنستذكر أن لدينا أديب وشاعر مثل ( سيف ) ورفاقه
فنعلم أننا عصبين على الإندثار ..قادرين على العوده
وفي بيتنا أمل…!!🌹
ونحن قلب الدنيا ديا ونحن عز الدنيا بينا …!🙌

ويبقى ( سيف الدين الدسوقي ) عطر الكلام وسحر القوافي ومتين تتحقق اللقيا ومتين يتجمعوا الأحباب
🥰

وبتعرف إني من أجلك 💕