(خمة نفس) ــ عبدالوهاب السنجك ــ يا حاج سيداحمد انت دحين الاطلس مشي وين؟؟ ــ بعانخي برس

لم يكن الامر مستغربا في كل الحالات والمناسبات فتغير الاوضاع السياسية في كل مرة، نتيجة بتقلب مزاج السياسيين يضع البلد في حالة من التوهان وعدم الاستقرار. فحاج سيداحمد له مقولة كلما تحدث” العصايا ربك خلقا معوجة من فوق لكن المعوجين نحنا ديل..
@…كيفن ياحاج نحنا معوجين ومكلوجين
@..انا ما بقصد في شكلكم، انا قصدي في عمايلكم وحبكم للبلد.

@..كيفن بعني؟

@..اقول ليكم انتوا البلد مش بلدنا من اجدادنا واجداد اجدادنا ما لقينا لينا فيها رئيس حكومة كان مدنية ولا عسكرية قال ممنوع اي مواطن.. اقول “مواطن” يمشي في الشارع من دون اوراق رسمية يعني لمن تكون عايز تسافر لي كسلا ولا مدني لازم يكون منوفست البص مطابق لبطاقات المسافرين.. لكن معليش ممكن الفين جنية بس في اول تفتيش تمر مع الشكر والتقدير.. وكمان اللواري والكناتر و…و دا كلام تاني.. يازول ما تخارج نفسك خت” القرصة” جوا الورقة..وهكذا..نحن..

@..طيب ياحاج الحل الانته شايفو شنو..

@.. الحل يضمنوا القسم الغليظ عند التعيين واي زول تثبت عليهو الافعال الاعدام قدام الشعب بس ماتقول لي عايزنا نلحق كوريا الشمالية ياحاج ولاشنو.. ما تلحقوها انتوا فضل فيكم شنو تاني، ما من زمان قاعدين يقصقصوا فيكم.. بس قولي انتوا مصر عدد سكانها فات المية مليون والحبشة ماشين ميتين مليون لسة اسع نحنا واقفين في التلاتين مليون.. راجعوا التاريخ عشان تعرفوا البلد مستهدفة من متين، لكن للاسف لسع ما لقينا راجل ود رجال يقول “نحنا السودان ابو الدنيا كلها”

@..والله ياحاج الليلة كلامك كتر تب..

كلامي لا كتر ولا حاجة اي زول مسك منصب ما فكر في البلد دي بس شغالين “بطني قبل وطني” ودا الفطسنا عدييل وطوالي نشكي ناقصين مازايدين، عندنا الارض حدادي مدداي ونيل واحد يجري من الحبشة والتاني من يوغندا وكم نيل صغير وكمان مطرة ورعد وقاعدين نقول عايزين الاغاثة وينا الاغاثة واخر حاجة الناموسيات.. والله قصة الناموسيات دي حكاية.. ياناس المنظمات دي ما تديكم حاجة رحمة ولا خايفة عليكم تديكم باليمين وتشيل منكم بالشمال.. وغايتوا بلد قاعدة هبابة سااااكت.

@..انت اتعلمت وين شايفين حجتك كترت..

انا اتعلمت في سنوات العز.. دخول المدرسة مجان والكراسات والكتب مجان والفراش يسوي الحبر بالصفيحة ونحنا نغرف سااااكت.. والداخليات والاكل مجان والجامعة مجان.. وكل مجان في مجان.. واسع الناس العاصرين البلد كلهم اتعلموا مجان.
واقول ليكم خلاص تاني الا نأكل بعضنا..

انت ياحاج قلت تعليمكم كان كان مجان بس عايزين نسألك في جقرافية السودان الاطلس وين؟

@..اخخخخ مالكم علي “لاتنكؤ علي جرحا”
الاطلس دا كان فيهو كل المواقع الهامة ومفصل تفصيل.. دهب، المونيوم، نحاس، حجارة فحم، رمال، و… و يعني انت تقعد كدا تعرف ولاية النيل فيها دهب، ارضي كسلااا فيها وفيها.. الجزيرة.. غرب السودان والشرق.. لكن انت تتعلم ليه.. وتعرف ليه.. الاطلس رايح واكلوا الدودو.. واسع ظهرت اليكم “الاردولات” مجموعات شركات تعمل في مجال الدهب.. ديل زي اولاد الموية لاعبين مع الحكومة لعبة القط والفأر، تهريب عدييل ممكن بالطريق العديل كمان “ادفع وخارج نفسك” والدولار يطلع والحكومة تجر لي تحت وممكن يصل مكان من الصعب خنقه..
تقولوا لي اطلس.. هي بقت علي الاطلس.. ماخلاص ضيعناها والبلد بقت مكشوفة وعريانة كمان والسترة صعبة بعد كدااا بس ياريت نقدر نتمسك بالباقي الفضل دا..

(خمة نفس)
ياريت حكومة الامل تستفيد من الاخطاء وبالاخص في مجال الذهب السلعة الاقتصادية الهامة وتنقب وتنبش كل مستندات الشركات العاملة في هذا القطاع وتحاسب كل من تجاوز صلاحياتة مع المحكمة العلنية الفورية.. وكلام الزميلة الصحفية رشان اؤشي واضح ومفهوم. َ