فوكس
هويدا حمزة
كلما بطنا طمت وشعرنا بالأحباط يطلع لينا طلعة يكتل بيها قلبنا ويخلينا نكورك جيش واحد شعب واحد ..
الحاجة الما كنا متوقعتها انه يمرق يتضهب لينا مع ستات الشاي ويلهط الزلابيا ويجغم القهوة بعدما جغم الجنحويد…لا لا كبيرة دي يا برهان والله القحتجنجويد بكونو انجلطو وهم متخيلين انك محاصر في القيادة .
عندما نشرت فيديو وصلني على اساس ان البرهان يصلي المغرب في المدرعات انبرى بعضهم ليقول لي (الفيديو ده قديم)فقلت لهم قديم قديم ما مشكلة ما تراهم الجنجا كل يوم جايبين لينا البعاتي في فيديو نحن الكضب ما بنعرفو ؟عشان نخدم الجيش ومن ثم نخدم قضيتنا مستعدين نكضب.
أحدهم اتصل وقال لي (يا أستاذة انت متأكدة الفيديو ده جديد؟حسب معلوماتنا البرهان محاصر في القيادة وعندنا ناس محاصرين معاهو .)قلت ليهو الحرب ما فيها معلومة مؤكدة لم اتلولو فيني قلت ليهو ياخ ده البرهان وده انت لو ما مقتنع اعمل رايح.
الزول اللذيذ فيهم قال لي (الزول ده ما قالو ما بصلي )قلت له (بقى يصلي بعد الحرب دورت ،الموت بقى قريب .
بالنسبة لضهب امبارح في حواري امدرمان وقواعدها العسكرية في الحتة دي البرهان كسر فينا كشعب سوداني ضلعة عدييل ببسالتو وجسارتو رغم من يقولون:(حا نستفيد شنو يعني من الضهب ده)نحن عاوزين نرجع بيوتنا )نقول ليهم أن شاء الله ترجعو قرييب أما القحتجنحا فمؤكد كسر قلوبهم عدييل.
طيب يا ريس رجالة فايتة الحد مافي شك ولكن ماذا بعد؟ نريد أن نطمئن وقد علمنا أن في نيتك بعد إكمال جولاتك الولائية المغادرة الي السعودية. ممكن نعرف ليه ياريس؟نتمنى أن لا يكون الأمر متعلق باتفاق سياسي لأننا حينها لن نسامحك ورب الكعبة وتتفق ليه بعدما راح اللي راح ؟وكتير اللي راح.الأرواح الأمن والسكن والطمأنينة والاموال والشرف لكن كل يهون لأجل الأرض والوطن نرجو الا تفجعنا فيك ،ليس نحن فقط ولكن الجيش أيضا لن يسامحك لأنك ستكون قد ازللته وهو في موقع القوة والمنعة والعزة والكرامة .
ومع من ستتفاوض ؟مع الجن ؟.اقسم بالله السماهم جنجويد ما كذب لأن أفعالهم ليست أفعال بشر لا كفار ولا يهود ولا اي شئ..ديل شياطين عدييل فهل ستفاوض الشياطين؟كمل حربك احسن لك فإما حياة تسر الصديق وإما ممات يغيظ العدا .
