الجانب الايجابي للحرب 1
كل الحروب في تاريخ البشرية انتهت…اما بالنصر لاحد الطرفين..واما بالصلح
فلا حرب تدوم…ولا صراع سياسي ..قبلي..
اوعقائدي يستمر…لان الانسان يحكمه العقل
في كلا الحالتين النصر…بتخطيط استراتيجي
لادارة المعارك بالعقل…
او الصلح والسلام بتحكيم العقل…لوقف الدمار
والخراب….
اذا الحروب تنتهي…
والدروس تبقى للفائدة..
وتكون الدروس ومايترتب عليها من تغيير
في المجتمعات ..هي الجانب الايجابي للحرب
او كما يسميه السايكلوجيين (النصف الملان من الكوب)
فماهو الجانب الايجابي لهذه الحرب العبثية
التى اشتعلت في وطننا منذ 15 ابريل
الماضي؟؟؟
مجتمعياً،،،،
كلنا عرفنا ان الجزيرة مضيافة.
وكل زول من ناس الجزيرة رجع لجذوره..للبيت الكبير
لأصله…للارحام الفقد الوصل بيهم الا عن طريق الهواتف..
وكل من باع جذوره وبيته الكبير …ورحل
للعاصمة ..اكتشف بعد الحرب أي خطأ ارتكبه في حق نفسه واسرته
واي زول كان متنكر للبيئة الريفية البتعتبر
جذور له وللأسلاف .بعد الحرب
حس بقيمة الهدوء في البيئات الريفية..
وحس بالفرق بين ضوضاء المدن وسرعة ايقاع الحياة فيها…وبين السكينة والاستفادة من الوقت وتوفيره
اتعرفت الناس بعد الحرب ..بأقارب لهم للمرة الأولي
واصبحت اواصر المحبة والحنين..والحنان
هي دواء نفسي وروحي …لمااصابتهم به
الحرب من اوجاع…وفقد لكل عزيز
وعرفوا ان الاهل عزة وعزوة..
عرفوا ان حضن الحبوبة.. والخال والعم والعمة.. والخالة ويابا ويمة… اوسع من اي
مساحات حسية…واجمل مافي الوجود،،،
اقتصادياً،،،،
انسان الجزيرة عرف انه فات ارض الخير
بكل ماتحمل هذه الكلمة من معني..عشان
شنو؟؟؟ عشان يعمل في العاصمة ويبقى خرطومي…وارضه بور…وسعيته تتلاشى
وعشان شنو؟؟؟عشان خبراته العلمية.. والفكرية …يبخل بها على ولايته واهله وعقابه…وللاسف يتكبدوا هم مشاق السفر
عشان يمشوا الخرطوم بحثا عن تلك الكفاءات
الكان ممكن تطور ..الجزيرة واي انسان ولاية
في ولايته..
وده كله ليه؟؟؟
اكتظت الخرطوم بالوافدين…واصبح الانسان فيها ليله ونهاره واحد..واصبح لاهث وراء الرزق …والمنافسة وتجارة العرض والطلب
حتى في الاشياء التي لا تستحمل ان نتاجر..فيها
علاج…دواء…غذاء
لكن بعد الحرب عرفنا انه لازم نطور ولاياتنا
رجعنا وعملنا في الزراعة في الجزيرة…رجعنا
عملنا في اسواقنا
عملنا في مستشفياتنا..بدينا نطور في مراكزنا
المهملة…بقينا بنشتغل مش بربع التمن…بنص
الربع في اي مكان..عملنا عيادة متحركة
عملنا مطعم متحرك..
عملنا محل عصير متحرك
عملنا بيع للخضروات..واللحوم ..والالبان
والمواد الغذائية بالعربات المتحركة..
وده كله لو كان تأسس من زمان وتطور مع
الوقت وصاحبته التكلونجيا..ماكان بعنا بضاعتنا…وعلمنا…واي امكانيات عندنا بثمن
بخس…عشان نحن ناس جايبانا الحرب وماعندنا محل …
لو كنا زمان طورنا جزيرتنا وكل ولاياتنا بحقنا
وبعلمنا..كان عبرنا..
لكن كل ولايات السودان عايزة تتطور في
الخرطوم…
والحرب..درستنا انه كل الخرطوم اصلها ولايات السودان المختلفة…بل اصلها الجزيرة
وخير الجزيرة وعقول الجزيرة…وكفاءات الجزيرة…
ونحن اهل الجزيرة…رجعنا وحنطور الجزيرة
وحتكون هي الحضن البجمع كل اهل السودان
سياسياً،،،
عرف الحكام والقائمين على الامر في الحكم
من ولاة …انه لاينفع نهمل البنية التحتية ..في ولايات السودان
ونكتفي بتطوير الخرطوم وحدها ..كأنها هي
وبس السودان!!!
وللاسف اول المواقع الهامه تضررت في الصراع المسلح
كانت المطار…واكيد مخطط لذلك ..وحتى اللحظة كل
الناس عالقين ..في حلفا ..والبورت…والحدود
الحبشية…والحدود الجنوبية والدنيا جايطة
وسبحان الله مطار مدينة ود مدني هبطت فيه طائرة الملكة اليزا بيث في الخمسينات
الا انه اندثر…وتاني مافكرت حكومة من الحكومات المتعاقبة…تشيد مطار في الجزيرة
معقول كده!!!!
الجوازات…البنوك…المصانع.. كل البنيات التحتية في الخرطوم..
ياخ الاوكسجين…والادوية المنقذة للحياة مصانعها في الخرطوم….وفي الحرب الناس لو ماماتت بالدانات…ماتت بنقص الدواء وقلة الامكانات
في ايجاد البديل في الجزيرة والولايات..
لكن الدرس اتفهم..
والتخطيط لتطوير البنيات التحية في الجزيرة وكل الولايات…بداء العمل فيه..
وسبحان الله زمن الثورة المجيدة الثوار هتفوا
حنبنيهوا…والحرب اللعينة كان سبب عشان
نبنيهوا…بعد ما اتهدمت الخرطوم
مش قلت ليكم جانب ايجابي للحرب!!!
