بحلم صاحي ما نايم
وما بقدر انوم تاني
بدور اصحى
واظل صاحي
عشان احلم
ويدوم حلمي
احلم بي تراب بلدي
وناس بلدي
وضل بلدي
وباب بيتنا
وصوت جيرانا
لما يصيحو لي امي
وافتح بابي بي فرحة
وبي بسمة ..يا يمة
الجيران بنادو عليك
وامي ترد حباب الجار
حباب اهلي
حالكم كيف؟
امان الله
معاكم انتو يا الجيران
لأول جار وسابع جار
لكل الحي
وناس الحي
ناس مدني
وناس ام در
وخرطوم بحري
في بالي
والسودان امانة علي
واجب فرضو الله علي
اضحي بعمري افديهو
بي عرقي وبي دمي
اقاتل ديمة احميهو
من الغل ومن الظلم
افني حياتي افديهو
دا صار حلمي
وصار همي
وما بنساو لو مت
حرائر بلدي في بالي
هم عرضى وعز وطني
شرف بلدي
واجبي علي احميهو
من الذل
بهم بيهم
دي حالة حرب
حرب ظالمة
ويا أسفي
بين اولاد بلد واحد
ماراعو الخراب المر
دمار بلدي
خراب بلدي
ضياع الناس وحق الناس
وقتل الناس
جثث مرمية في الطرقات
وفي الساحات
واطفال تبكي فاقدة امان
وام تبكي وأم مفجوعة
فاقدة وليدة وا اسفي
حرب ملعونة
صوت الدانة هز البيت
وتسمع انة الموجوع
وصوت صرخة
طفلة صغيرة
فاقدة الام
وشيخ مجروح
فقد ايدو
وبيت انهد فوق الأرض
داحال بلدي
وناس رحلت سابت دارا
واأسفي
وناس استشهدت ماتت
عشان عرضا
رحلنا خلاص
تركنا الدار
ما من خوف
وحات الله
ما بنخاف أكان متنا
هو موت واحد
الا العرض ما ممكن
نفرط فيهو لو متنا
دا صار حلمي
ناس ماتو
ناس رحلو
وناس ضاعت
وما عارفين نهاية الحال
تركنا بلادنا مغصوبين
صبحنا اغراب بلا وطن
وما عارفين رجوعنا متين
ولسة الحرب دوارة
ما بتقيف
وكل قادتنا ما هامين
وهم داريين
وما شاعرين بهم الناس
عشان السلطة
بدفع في الثمن مسكين
هم عارفين منو البقتل
منو البنهب
منو البنهك عروض الناس
وما بسأل!!!!
ومابهتم!!!!!
اضاعو هيبة السودان
دا كان هدفم
الا الهبيبة مابضيع
اكيد نرجع
وقوميتنا مابضيع
ويرجع تاني سودانا
شمس تسطع
وترجع عزة السودان
دا كان حلمي.
