تعالوا نوريكم الشلب حق الخواجات…
جيرانا الساكنين فى اخر الشارع بتهم (مارينا) بتقرا فى الجامعة ….ساكنة مع صاحبا (ستيفن) فى بيت صغير قريب شديد من بيت ناس امها..
يوم الصباح كالمعتاد ستيفن وصلا الجامعة ورجع ماشي شغله..بس هي بعد ما مشي قالوا ليهم المحاضرة ملغية عشان المحاضر مريض..
فكرت تزور صاحبنا كاترين الكانت غايبة عشان مريضة..فقالت اعمل ليها مفاجأة ..مشت بالباب الخلفي.. وهى بتعاين من خلال الشجر تشوف ليك زولا الما يغباها قاعد مع كاترين فى كنبة واخر حبكانة ..طوالى رجعت فكرت تنتقم ..اخيرا مشت لى صاحبتا التانية (روزا) ومشوا سوا السوبرماركت..اشترت حاجات وساقت صاحبتا مشوا اكلوا فى مطعم ومشوا على بيت ناس امها..
لقت البوليس والهيلمانة امها اتسرقت منها قروش ودهب..البوليس سألا كانت وين صاحبتا حكت كل شي..البوليس سأل لو فى زول تاني عنده المفتاح قالت هى وستيفن عندهم مفتاح..البوليس مشى بيتها هى وستيفن مافى زول بس شنطة ستيفن…لما فتحوها لقوا فيها الدهب والقروش والمفتاح…..
طوالى قبضوا ستيفن وهو يكورك ويحلف انه ما سرق..سألوه بعد وديت مارينا الجامعة ورجعت مشيت وين..اتلعثم وما قادر يقول كان مع كاترين بقت الادلة ضده…ادوه تسعة شهور سجن..
طبعا كاترين سابتو قالت حرامي ومارينا برضو خلتو…
لما بقي علي خروجه يوم مشت مارينا زارتو فى السجن ..قعد يحلف ويتقطع انه ما سرق..بكل برود قالت ليه…
(عارفاك ما سرقت..العقوبة دى حقة الخيانة…انا اليوم داك المحاضرة اتلغت ..قلت ازور كاترين شفتكم الاتنين خالطين…وآخر حب…..جيت بيتنا شلت مفتاح بيت ناس امي ومشيت شلت القروش والدهب وجيت ختيتم ليك فى شنطتك وطلعت سقت روزا عشان تكون شاهدة اني ماجيت بيتنا ولا بيت ناس امي..)..
كدة ما تقدر تعمل اي شى وكل الادلة ضدك ..عشان تاني تخوني .
