النسيبة الالمانية………….!
عفاف عدنان
كنت وزوجى وابنى فى إحدى أمسيات الاسبوع السابق جالسين نتسامر عندما رن جرس الباب…تعجبنا اذ اننا لا ننتظر ضيفا…فقام ابنى ليرى القادم ..فرايت صديقتى (كونى) والتى تجمعنى بها صداقة قديمة جدا…تعجبت إذ أنها عادة تقدم وصخبها يسبقها فهى مرحة جدا ولكنها كانت تبدو غاضبة أو ربما حزينة….
جلست وهى ساهمة فقمت اصنع الشاى الذي تحبه…ثم جلست إليها ودار بيننا الحوار الاتى والذي سأقوم بترجمته بتصرف….كلمة بتصرف دى ختوا تحتها خطين….لأنني احتاج للغة متفردة..
_شنو يا ولية…مالك شايلة الدنيا فى راسك ؟
_الزفتة الما تتسمى …
_منو ؟
_مرة(دانيال ) ولدى….(دانيل هذا ابنها الصغير بالتبنى….وقد احبته كما أحبها جدا ونجح وتخرج مهندسا.. )…
ثم واصلت……انتى عارفة انها اكبر منو بخمسة سنة ومطلقة وعندها ولدين…
_طيب هو مش بحبها وسعيد معاها ؟
_شنو بس لحست مخو …اولا سكن بعيد شديد برة البلد عشان انا ما اقدر ازورو كل يوم…ودة اختيارا هى عشان زمان كانوا ناس امها ساكنين هناك…وبعدين هو بعد شغلو الصعب دة يمشى مع اولادا التمارين…(ثم فتحت تلفونها لترينى صور ليهو مع اولاد زوجته بلبس الرياضة …نظام بيان بالعمل…)
_معليش ياخ المهم انو سعيد وانتى عايزة شنو اكتر من كدة ؟..
_عايزة اشوفو…واقعد معاهو…
_طيب خليهو يجى يقعد معاك الويكند الجاييى…
_كلمتو الشهر الفات قام جا …وجابا معاهو…الما بتخجل …لاصقة فيه زى القرادة وكمان لما يجينى فى المطبخ تجى تسوقو تقول انها ما بتحب قعاد المطبخ..
ولما نقعد سوا فى اى حتة تجى تجروا من يدو تقول ليه يلا نتفسح……حتى بالليل لما نقعد نتونس بعد العشا تقعد طول الوقت تقول ليه يلا انا نعسانة ولما يقول ليها امشي وانا بجى تقول ليه عارفنى ما بقدر انوم براى..!….
فى الحقيقة غاظتنى الولية …قمت قلت ليها ما عارفة اقول ليك شنو….انتى خلاص خليه على راحتو…وهو براه لو ما سعيد بخليها …خصوصا انهم ما عندهم طفل مشترك… ..
_ايوة وكمان قالت ما عايزة تولد تانى كدة كفاية…يعنى ولدى يقعد بربى ليها عيالا….ويطلع من المولد بلا حمص…بس كدة كويس ….
_كويس كيف ؟ عايزاه يقعد بدون أطفال ؟
_لا…بس برضو كويس..!
نظرت لها فى تعجب …كانت تبتسم ابتسامة صفراء…قلت ليها (فى شنو فى راسك يا كونى ؟)
_حاخليه يصاحب واحدة عليها !!
