الصورة……!
فوزية جارتنا زمان فى سنار..اتزوجت واحد من الخرطوم وسافرت معاه السعودية وأنجبت طفلين…
مرة زوجها قال ليها انا مسافر الخرطوم فى مأمورية تبع الشركة لمدة شهر..وسافر ورجع بس هى لاحظت انو كان مبسوط حبتين..كل ما يكون براهو يغنى وخاصة اغنية (توعدنا وتبخل بالصورة..).. لما جات اجازة الأولاد قال ليها امشي انتى وسوقيهم وبعد ترجعي انا بمشي عشان عندى شغل وما عايز اضيع ليهم الاجازة..
فعلا هى مشت الاجازة وفى سنار عرفت انو ولد جيرانهم القراب شديد ماشي يعرس فى الخرطوم قامت سافرت معاهم..
هناك واحدة جارة ناس العروس ساقتا بيتهم عشان زحمة العرس …بمجرد ما دخلت الأوضة لقت ليك صورة الزول الما يغباها مصنقر فى مكتب وقداموا التلفون والكمبيوتر..فجأة سمعت البت بتقول ليها بتعرفي الزول دة ؟ قالت ليها بسرعة ابدا بس شكلو زول كبير فى مقامه..دة وزير ولا ظابط ؟! البت قالت ليها ابدا دة خطيب اختى…ما سائل فى الوزراء ولا الظباط…وحيتزوجوا فى الاجازة بعد تلاتة شهور..عاد بحبها شديد بس للاسف كان متزوج واحدة لئيمة وجاهلة وعلى العليها عاقر ما بتلد.. طلقا لما شاف اختى..وكان طلب من اختى صورة ابت ليه قال ليها كدة كدة حاتزوجك…
فوزية يا يمة صمود الصخر..قالت ليها ربنا يتم ليهم على خير..بعد البت مشت طلعت الكاميرا وصورت الصورة المعلقة فى الحيطة..(الوكت داك ما فى سمارت فون)..
رجعت السعودية واصلا ما ابدت ليه انها عرفت حاجة..ومضت الشهور وهى ممكونة وصابرة كل مرة تشوفوا يتسحب براحة يكون شايل حاجة بسرعة يطبلا فى الدولاب وهى اصلها ما اشعرتو انها مراقباهو..
لما جا يوم السفر قعدت تجهز ليهو فى شنطتو وكانت عارفة انو فى شنطة السامسونايت خاتى القروش والدهب.. لما جا الليل عملت ليه عصير بعد العشا عشان ينوم كويس وبدري يحصل الطيارة..ختت ليه حبة منوم ..ولما استغرق فى النوم شالت المفتاح من جيبو فتحت الشنطة براااحة وشالت الدهب والقروش…وختت ليه ظرف بي فوق فيه صورتو اياها وجواب صغير مكتوب فيه..
هى بخلت بالصورة وانا اهديك صورة..
يصوروك يا يابا فى قسم البوليس.مجرم مطلوب القبض عليه..
ويصوروك يا يابا فى المستشفى الدربات ما تديك الدرب..
يصوروك يا يابا فى المشرحة مشوه ومعولق ما يلقو اليعرفك..
التوقيع…
الجاهلة اللئيمة..العاقر.. المطلقة..فوزية…
عفاف عدنان…
