الطيب عبدالماجد يكتب ..يوميات علوب …!! ( بخور التيمان …وسطور بن كلثوم ) _ بعانخي برس

يوميات علوب …!!

( بخور التيمان …وسطور بن كلثوم )

زمان كان معانا ( تيمان ) كدا في المدرسة مختلفين في أي حاجه إلا الشكل ( تطابق كامل ) لدرجة إنو الأساتذة ما بفرزوهم بنعرفهم نحنا ديل بس ….
وفي نحنا ذاتنا القريبين منهم شديد …!!

بس في واحد هادي والتاني مشوطن

وهم طبعاً في نفس السنة لكن موزعين على فصلين

( وبضاري من العين ) …!!

الغريبة أساميهم مختلفة ( حمزة والعباس )

نحن طبعا الألف واللام بتاعة ( العباس ) دي ما قدرنا عليها شلناها بره …( بتعسمنا ) كدا

بنقول ليهو ( عباس ) حاف ..!!

( عباس ) ذاتا ماصمدت كتير ….بقت ( عبس ) …

( أصلو التنازلات إذا بدت بتؤدي إلى تنازلات أكبر )

المهم يازول ( حمزة ) مجتهد كدا ومهتم و ( عباس )
( رمتالي ) ساي متابع الفارغة ….

أها اليوم داك كان عندنا ( تسميع ) لي الجزء الاول من معلقة ( عمرو بن كلثوم )

أَلا هُبّي بِصَحنِكِ فَاَصبَحينا
وَلا تُبقي خُمورَ الأَندَرينا
مُشَعشَعَةً كَأَنَّ الحُصَّ فيها
إِذا ما الماءُ خالَطَها سَخينا

و ( عبس ) مما عرف ألخبر خلط ( موية وبنزين )
وبقى يبطبط ..
والحصة عند منو ….!!! ؟؟

( أستاذ الزبير ) …….!! وما أدراك ما الزبير

أخطر أستاذ عرفته المدرسة والمدارس المجاورة
جزء كبير في الفصل على قناعة تامه إنو أستاذ ( الزبير ) دا هو ذاتو ( بعانخي ) البدونا ليهو في التاريخ …!!

شوية كدا ويمثل في ( مسلسلات رمضان ) من شدة ما مجود اللغة ….!!

( ياخ دا بضحك بالعربي ) ..!!

وضحكتو موسمية …!!

أها ( الزبير ) دا إذا زول غلط في العربي غلطة كبيرة كدا بتجيهو حالة ….!! ( سنونو بتتطاقش ……وبستحول )

ولو جيت ما حافظ …..
(لملم كرامتك وزح بعيد ….ما يجلدوك ) يا …..
سيد الوجع

مره قال لي ( القرج ) ……

(( القرج دا بقرا معانا في الفصل لكن روحه محلقة في الشوارع ))

قال ليهو نايب الفاعل حكمو شنو ..!؟؟

القرج قال ليهو …… ( معرج ) …😂😂

( بدقو فيهو لمدة اسبوع ) ….!!😂😂

هذا هو الزبير فى ( كلمات ) …أو ( لكمات ) 🥊
الاتنين شغالات …أيهما ( أوقع )

والاتنين ( واقعاتن ) لينا

وجاء اليوم الموعود …!! وليلة السبت ..

( دبل عربي ) الحصتين الاوائل ……وتسميع

( دكوة معطونة في بصل ) 🤓

بس التوم جرى لي أخوهو في محاوله أخيرة
لتجنب ( النووي )
إنو ( حمزة ) ( تومو ) دا يجي بدلو في الفصل ويسمع القصيدة ..!

( التسميع ) عند ناس ( حمزة ) إنتهى قبل يومين في ( فصلم ) والليلة يومنا في قطع الكهرباء …!!

المهم غايتو ( حمزة ) طبعاً ماعجبتو الفكرة وحسا إنها
ما ( بتشبهو ) لكن يسوي شنو …!!

( قلب التوم ) …💕🥰

فوافق يخوض الحارة نيابة عن الشقيق …
( وشددنا عضدك بأخيك )

رغم سوء المنقلب

وبالفعل جا قعد محلو ..

( نحن زي سبعة كدا بس العارفين انو دا ما عبس ) …!!

ايواااا نسيت أقول ليكم
( عباس ) في الأيام الفاتت دي كان لافي يدو كدا
بي شاش وعامل قصة قال ( مجروح )
وهو أصلًا بهول الحاجات أظنو عشان ما يكتب ✍️
ولا شنو ماعارف

يازول ( الزبير ) جا داخل كأنو دخل فينا دفار
وكت كتب ( تسميع ) دي في السبورة …!!

كلنا سمعنا دقات قلوبنا ….

( الله يرحم سيد خليفة قايلنو بهزر ) ….

وانا قلبي بدق

طوالي اتذكرنا يوم القيامة …
رجلينا بدت ( تتطاقش ) وشوية شحتفة في الروح
ونقص حاد في السوايل ..!!

عندنا واحدين حافظين نص نص كدا لكن أجواء الأزمة دي نستم النص ذاتو …!!

المهم زولك بدا ب ( العلما ) القدام ديل كان يفتحو شهيتنا وينعشو ذاكرتنا …!!

واحد كدا إسمو ( أبو القاسم ) دا كمان حافظ
المعلقات السبعة كلها خلي دي …!!

قصير كدا ( المُعلقة ) أطول منو ….!!
لكن ( الجريدة ) بحفظا …
بدا يقرا ما وقف … لحدي ما الأستاذ وقفوا ….!!

أها نوع ناس ( أبو القاسم ) ديل ياهم هم ذات البحرجونا مع الأساتذة وجايبين لينا الكلام …!!

( برمش كتير كدا …بكون بفعل في الشريحة واضح إنو الكهربا عالية ) …

مره عندو ( ايرقان ) غاب تلاته اسابيع برضو مقفل…!!😳
( معناها نحنا العندنا ( اليرقان ) 😢

كان عندنا إختبار ( رياضيات ) 🧮 وكت قالو
( مضي نصف الزمن ) ….!!
أبو القاسم ) دا قال داير ورقة تانية …!! 😳

( غايتو جنس إحباط ) …😢

ورقة تانيه لي شنو يا أبو القاسم ياخ
بتكتب في شنو إنت …!!

محاية ..؟؟

( زمبا ) المرة الوحيدة الشال فيه ورقة تانيه عملا ( مُركب ) ⛵️ 😂

( زمبا دا زعيم المعارضة في الفصل بحكم الأقدمية)
ما شفنا يوم واحد رمش ..مفتح زي السمكة ..!!
( معناها الخط مقطوع ) …!!

أها ناس ( زمبا ) ديل وبقية والرفاق في كنبة ورا بتغالتو
( لييي ( عمرو ) دا يسمو بي أمو ….!!؟؟

قايلين ( كلثوم ) دي يعني ( كلتوم ) 😂😂

غايتو ( الزبير ) كان سمع الحوار دا كان اعتزل …!!

( دا إسمو الخلاف في وجهات النظر والانصراف عن القضايا الاساسية ) …

أها أستاذ ( الزبير ) لافي في الفصل … وسط حالة من الصمت الرهيب …!!
يبحث عن ضحاياها بعناية ..فجأة كدا بقيق جنبك ويتم اختيارك ل ( اللوتري )

المهم الدور جا على ( عباس ) …..!!
أستاذ الزبير دا ( بركن ) 🚑جنبو برااااحة كدا ….!!
وبي صوتو ( الحنون ) داك قال ليهو …!!
عبااااس …!!

إقرأ خمسة أبيات بعد ….!!

صَبَنتِ الكَأسَ عَنّا أُمَّ عَمرٍو
وَكانَ الكَأَسُ مَجراها اليَمينا ….!!

( دا مش عربي صريح ….أها نحن سامعنو صيني )

وطبعا حمزة قاعد محل اخوهو

( الإسم ( عباس ) والمكنة ( حمزه )

غايتو أخد ليهو رترته كدا …لكن في النهايه اشتغل
طقطق الأبيات زي المافي حاجة …!!
أستاذ الزبير ذاتو استغرب قال ليهو ماقصرت الليلة …..جيد … !! إترمي أقعد …!!

( المهم القصة عدت بسلام )

(( بس مرات الدنيا دي وكت تقصدك ما بتخليك ))

قبل ما يمشي للبعدو فجأة كدا أستاذ الزبير دا استدار وبدون سبب …….( إنه القدر )
إتلفت عليهو قال ليهو الجرح نشف ولا شنو …!! ؟؟
شايفك فكيت الشرايط المربط بيها دي …!!

الظاهر قالها بي عفويه كدا لكن جا عليهو داير يشوف الجرحة دي …!!

( أها دي الدنيا لما تدور تحكها وتحددا معاك )

يازووول لقى ما في أي أثرٍ لي أي حاجه …!!
اندهش كدا وقلبو أكلو……!!
المهم دخلو شك انو دا ما ( عباس ) 😳

خاصة إنو عباس دا بكون ( مترب ) كدا و ( معولق ) من قعاد الضلله ومتابعة ستات الفطور …!!
عكس تومو ( حمزة ) دا بجي متمر كدا ونضيف …!!

( ودي فاتت على ( التيمان )

المهم فجأة كدا ( الزبير ) دا كورك …..!!😱
يا عثمااااان …
( عثمان ) دا الغفير والقائم بالأعمال في المدرسة وعمك دا بنادو في حالتين اتنين بس
إنو تكون في أزمة مدرسية …ولا يجيب سيطان ( بالستية )

عندنا شجرة كدا نحن كنا قايلنها أصلًا هي شجرة ( سيطان ) يزرعو السوط بقوم شجرة ..

( شجرة الحب ) …..!!💔

وعثمان دا بنتشي كدا عندما يكلف بهذه المهمه الإنسانية وبخلص شديد في العمليه ( البشعة ) دي بحس إنو المبعوث الأممي لمناطق النزاعات
بحري جري ينجز …!!

تشوف الابتسامه وهو بقطع في الفروع ..
تقول ( حنة ولدو ) …

( الوكت دا الحسان ( الهولنديات ) بكونن بقطفن في أزهار التوليب 🌷على تخوم ( نورد أوست ) الهولندية 🥰

وعثمان يورد في السيطان

ومرات بخلي حبة ( شرا ) كدا وزوايد في الفرع البقطعو لمزيد من الإيلام …!!

عثمان دا لازم نشوف المأساة المرا بيها في طفولتو

( دا شغل كفار ) ..!!😈

المهم الزبير قال ليهو لا ما ( سيطان ) نادي لي ( حمزة ) من ( جماع ) …!

( جماع دا اسم الفصل بتاعم )

نحن ( دقنة ) ….!!

المهم جابو ليك ( حمزة ) دا اللي هو في الاصل ( عباس ) …!!

يازووول ( أبو حمزة البغدادي ) ما جابو كدا ..🚶‍♂️🚶‍♂️

وعمك ( عثمان )حاسي ليك بالعظمة المواضيع الزي دي بحلق معاها ماشي ليك وراهو زي الرهينة ….!!
قرب يربطو

( أول حاجة ( اتحفظو ) على يد ( حمزة ) العندنا
دا …!!
لو لحق لما جرحا ……!! تاني إلا ال DNA )

المهم جابو ( عباس الأصل ) لقو الجرحة ذاتا جرحة صغيره تافهة كدا ما بتستحق ( رشة ملح ) خلي اللفليف دا …
اها يازول بعد التحقيقات والضغط والتهديد والمواجهة اعترف الطرفان بحدوث التبادل التجاري …!!

وتم التأكيد انو التوم ( حمزة ) حا محل ( العباس ) في الفصل …!!

غايتو الزبير دا داير يجن …!! وعباس دخل في أمراً ضيق

ياخ نحن المراقبين ريقنا نشف خلى عباس باعتبارنا مشاركين في الجريمة بالتستر ….!
لكن مافي زول عارفنا …وحتى لو واجهونا والله ننكرو حطب …!!

أها في عز الاجواء المتوترة دي أستاذ ( الزبير )،قدم مبادرة توفيق أوضاع قل لي ( عباس ) والله تقديرا لي اخوك الحافظ دا والأنا عارفو مُجبر على العملية المعيبة دي …!!
( شوف المعيبة دي كيف …الزبير يا مكتب )

اها قال ليهو لو قريت لي تلاته أبيات من المعلقة دي
ومن اي حتة …بفككم الاتين ….!!

( غايتو أستاذ الزبير متفائل شديد ) ….
عباس دا بيتم ما حافظو خلى أبيات المعلقة

المهم ( عباس ) استغل الانفراجة المؤقته دي والمزاج المنفتح لأستاذ الزبير وافتكر المسألة أخد ورد …
وتقدم من جانبه بعرض ( صفقة ) لتبادل الأسرى
قال لي للأستاذ دا لو حاكيت ليك
صوت الكديسة بتفكنا …..!!😺

( غايتو أستاذ الزبير دا كأنو كشحتا فيهو موية تلج ….!!!
بقى في حالة ذهول كدا وصدمة ما مصدق …
قال ليهو نععععععم ..
عباس خلاهو ليك على بعد خطوات قليلة من الجلطة 👽

بس كورك ليك لي عثمان بي طول حسو 😱😱
المره دي مؤكد ( سيطان )

يازول نحن على حس ( الصفقة ) 🤝الاتقدم بيها عباس دي ( الصفقة ) 👏👏 دورت …
لأنو نحنا عارفين كويس جداً إنو ( عباس ) دا بجيب صوت الكديسة أحسن منها هي ذاتا …..!!😻

بأمانة يعني ….!!

وأمام هذا المد الشعبي والتصفيق الحار الزبير نفسو
بدت عليه علامات التراجع وحب الاستطلاع يشوف قصة الكديسة دي شنو ..!! حسا إنو في حاجه تستحق النظر والاستماع فعمل approved

والله يا اخوانا الساعة العباس دا الغمض ليك عيونو
وقال كدا دخل في شخصية الكديسة دي ….

قولة ( وخخخخخخخ نياااااااو ماااو ) 😸😼🙀

نحنا بقينا نعاين في الحيط إنو فعلا في كديسة جات في الفصل دا ….!! 😳😳

ياخ قصة ما معقولة

أستاذ الزبير بكل عظمته وجبروته داير يقع من الضحك
😹والصدمة 😳
قال ليهو هسا عليك الله الوقت الضيعتو في تجويد
الصوت دا ماكان حفظت فيهو المعلقة …!!

عباس تاني ردا عليهو بي صوت الكديسة 😺

( انهرنا نحن من الضحك ) 😂😂

أول مرة طبعاً نشوف أستاذ الزبير مسحور …!!
امام هذه الملهاة
( تجويد شنو الزول دا ولدو كدا )
ما زاد قناعتنا الراسخة في الفصل انو ( التيمان) أصلًا ملبوسين بالكدايس كما تقول الأسطورة…!!

وعثمان يعاين ساكت زعلان الليلة مافي حفلة بطان
وجلد …
لكن ( فطسان ) من الضحك في القصة دي

( بركة الضحكتا يا ملك الموت )

الغريبة علاقتو مع ( عباس ) دا كويسة بجيب ليهو
الفطور ….وبيناتم مصالح
لكن لما يرسلوهو للسيطان دي زي ( بغبي ) كدا …!!

وهكذا انتهت هذه الازمة العنيفة بهذة التسوية الأليفة

( القرج ) قال لي غايتو نحن البيوت الوحيدة المتذكرنها من الزول دا …!!

( الزول دا عمرو بن كلثوم ) ما يفوتكم

قال بتاعة ( مأكمة ) ديك و ( رجلين ) حبيبتو …

وهو يقصد

وَمَأكَمَةً يَضيقُ البابُ عَنها
وَكَشحاً قَد جُنِنتُ بِهِ جُنونا
وَساريَتَي بَلَنطٍ أَو رُخامٍ
يَرِنُّ خُشاشُ حَليِهِما رَنين

طبعا دي ( أستاذ الزبير ) شرحا لينا ( بتحفظ ) كد لحدي ما مشينا بحثنا برانا ..!!

( أريتنا كان بنبحث كدا في التفاضل والتكامل كان بقينا مهندسين ) …!

( القرج ) حافظ الزيت وناسي البيت …

( ولادة الندم )
…
ونحنا ( ساريتي بلنط أو رخام ) دي قايلنها قاعة الصداقة لحدي ما طلعن رجلين الحبيبة …!!

( بن كلثوم اختار الدنيا )

غايتو ( المعلقة ) اتعلقت ( عليقة ) ( المشلعيب )
ولأول مره الكديسة شربت اللبن ..!!

وَكَأسٍ قَد شَرِبتُ بِبَعلَبَكٍّ
وَأُخرى في دِمَشقَ وَقاصِرينا

شكيتك على الله يا ( عمرو بن كلثوم ) كان في المعلقة دي بس شارب ليك عشرة كاسات
كل ما ينزل في حتة الزول دا يشرب ليهو كاس …!!

هو يشرب ونحن ننجلد

( أبو القاسم ذاتو فاضي البتابعك )

وكلنا بعد الحصة محتفلين ليك بي ( عبس )،
ومسيرنو ليك

بازوووول ناس ( زمبا ) ديل بالدفوف والصفقة فوووق
👏👏
احتفالاً بأول إختراق أمني للأستاذ الزبير ….
( حمزة ) يضحك سااااي بعاين من بعيد …

ونحنا مدورين ليك

وبتغتيلو يا ( عباس ) يا عينيا انا وفي ( دقنة ) ماخذ الكاس يا عينيا أنا ….!!
( وعبس مارق مروق شديد ) 🕺….!!

دي ما المشكلة المشكله في ( عثمان ) البصفق معانا دا ….

( يجلد ويداوي )

كانت لنا أيام….!! 🌹