( هدنة )
( مزمار ( توتي ) …وصوت الأرض )
حمد الريح ( التربال ) الذي يلبس ( البدلة )
روح نقية وقلب أبيض وصوت ( حقو برا ) …!!
ينتقي من الأغنيات الحنين الرصين …فتشتم رائحة الأرض والتراب والطين …
( أفندي منضبط ) يعمل في جامعة الخرطوم
و ( تواتي ) مريد في ( جزيرة الأشواق ) و ( لاعب كورة ( صريح ) في بداياته …..!! وممثل ( الحنين ) في الأغنية السودانية …!!
( كفر ووتر وبنطلون وقميص ) …!!
ولو عارف عيونك ….!!😍
( حمد الريح ) دا قالو زمان الجماعة كانو بحبو بيهو
عندما ( يدس ) أحدهم ورقة في يد ( قسيمة الريد ) 🥰فتستعجل الخطى حتى تفتحها في مكان آمن )
فتقرأها ( ملحنة ) ….وبظهر في عيونا 😍
وبريدك يا شقى الأيام كان بيك الحبيب يسعد💞
وعندما تهجره وتمارس ( الصدود والهجران )
لن يجد غير ( حمد )من يمثله في ( محكمة الحب )
وضامر قوامك لان …قلبك قسى وجافي
ليه يا جدى الغزلان ..!!؟
أسهر تجدني ملان ….يذرف دمعي نازل
كالمزن في الهملان ….💞
فيكسب القضية ( وجداً وشوق ) …!!
( ومذكرة الدفوع دموع 😭
( وما بصح ليك يا فلان ) …!!
وإذا تعثر الدخول لأحدهم خوفاً ورهبة يناور من بعيد من أرض المعركة مستخدما ( مُسيرات ) ( حمد )
وياقلبي المكتوب كمد ..💔
وهذه كتبها الساحر ( عثمان خالد ) ود ( بارا ) السمحة
فمنحته جمالها ….
ودك بها القصيده حصون التقليديه في الشعر الغنائي وقتها بالخرطوم وقفزت ب ( الريح ) إلى الواجهة
غناها بالتخصص …وكتبها (خالد ) من روحه
والجمهور استلما بي سدرو…🥰
( وعثمان خالد ) ( لعاب ) لكنه زاهد في الظهور
وبجيهو صاد …!!
وكل العمر كان لحظه واحدة نشوفو، والشوق يتّقد..
( من علمك هذا يارجل ) 💞
( حمد الريح ) فنان ملتزم ومحب ومطلع
لذلك غنى ( مريا ) ….!!
فغزا ( الأغاريق ) روحاً وصوت
ونقل ( فدياس ) للأراضي السودانيه بتأشيرة ( زهور )
فالذائقة السودانيه فسيحة تتسع …والناس في بلدي يصنعون الحب ..💞
فكانت ( مريا ) التى نحتها ( المتدفق ) ( صلاح احمد ابراهيم ) وأنطقها ( حمد ) ..!!
وليت لي إزميل فدياس وروحاً عبقرية …
وأمامي تل مرمر
لنحت الفتنة الهوجاء في نفس مقاييسك
تمثالاً مكبر ..
وجعلت الشعر كالشلال،
بعض يلزم الكتف ………..!! وبعض يتبعثر …!! 😍
( جن رسمي ) ….!
( غايتو ولدنا صلاح احمد ابراهيم ( دقا ) ( فدياس ) ذاتو )
( دي ياها الصواريخ البالستية العابره للقارات البحيبوها في الأخبار )
فنقلا ( مريا ) من ( اليونان ) إلى الوجدان …
( ترانزيت الخرطوم )
يقول ليك الحرب دخلت شهرها السادس ..!!!😳
( ناس ( صلاح ) ديل دخلو ( أثينا) ذاتا )
و أدخلونا معهم …..!!……وبقلم وكمنجة ..!!
( دخلوها ( وعبيرا ) قام ) 💞
( حمد الريح ) لسان لحال كل المغتربين والمهاجرين في
أرجاء المعمورة …يصلهم صوته ( الحنين ) فينقلهم
أسرع من ( القطرية )✈️ الي أهلهم والصحاب …!!
ويبث أشواقهم (الدفينة ) ومشاعرهم ( المكسورة )
و ( أرواحهم) ( العطشى ) للبلد والناس 🥰
( وشوق لأهلي والصحبة
شوق لكل جميل في الحي ) 😍
وقد تجول ( المرهف ) في كل الأرجاء ووصلهم هناك مواسياً ومخففا و ( أنيس )
فكان من الفنانين الذين تنتظرهم الجاليات السودانية حول العالم بلهفة وشوق …وأنا وأشواقي والساعة ..!!
فالرجل إرتبط في وجدانهم بالأرض…والنيل …والتراب
وحليل ناس ليلى ساعة الليل يجن
الليلة ما عاد المراكب شرقن 🙌 الرَيَّح
فينفرط عقد المشاعر ويسيل جداول
وإحداهن على الطاولة في بلاد بعيدة تبكي وتبتسم في وقت واحد …!!☺️🥲
فقد تذكرت الوطن وقد غنى ( حمد ) في عرسها قبل سنوات خلت …
وبناتها يرقصن أمامه …!!
تذكرت حلمً البدايات …وهاهو يواسيها لوعة الهجرة ومتلازمة الاغتراب 😥
( والقمري فوق نخل الفريق فاقد الاهل
يبكي ويحن ) …😭
وقد كتبها ( سليمان عبد الجليل ) وقد لايعرفه الكثيرون لكنه شاعر مسكون بالجمال …!!
سليمان دا الكتب ( الوصية )
( وأوعى ليل الغربة ينسيك ريحة الطين في جروفنا
والتميرات البيهفن ديمة راقصات في حروفنا
ونحن راجعين في المغيرب 🎼
ودي أشهر ( وصية ) في تاريخ الأغنية السودانية
مع ( وصية ) ( وردي ) للهرم ( إسماعيل حسن ) …
وأم الوصايا ….( جدودنا زمان وصونا على الوطن )
وحلفتك يا قلبي الخانك تخونو
الفايت غرامك اوعك يوم تصونو
زي ما أبكى عيني سهر لي عيونو
اوعى تقولي تاني ما بنعيش بدونو🎼
(إسماعيل حسن ) لاعب (ضاغط ) ووصية ( حمد ) فرض ( عين ) …!!
وكيف العين تجافي العين …
وكيف ننساها ريحة الطين
حال البلد واقف …!!
لكن نظل واقفين .🙌
وجدودنا زمان …لم تفتح بعد ..!!
امكن بعد حين ..!!
وبالنسبة ل ( اسماعين )
القلب كان ( حبا ) زي سمك البحر
بصعب عليهو الساحل
( والمحرش كان رقيق ….لا بصد حبيب لا بكاتل
و ( إسماعين ) رقيق ….إلا النفس بتناتل …
( وأنا عارفو قلبك أبيض وكلك حسن نية )🥰
وقد التقى ( إسماعيل حسن ) و( حمد الريح ) في
( طير الرهو ) …!!
( إلا نطير )
ورغم الحديث عن اسقاطاتها السياسية
كل حلق بها حسب جناحيه ..
ووالله يا طير الرهو
قسماً عديل ما فيهو لو
دمع الحبايب زي دموع السارية
في وادي البعيد وتسوي ( شو )
( شوف ( شو ) دي ) ….!!!💦🌧️😳
( صورة وصوت )
غني ( حمد ) للأرض والنيل والوطن
وغنى ل ( توتي ) التي تتحزم أيام الفيضان وملصو
البدل والقمصان ….
وأثارت أغنيته ( الساقية ) جدلاً كثيفاً في كونها أغنية سياسية رمزية ولم يتم حسم ذلك …
فقد لحنها ( المتفرد ) ( ناجي القدسي ) وكتبها ( العبقري ) ( الدوش )
( والدوش يدوش بلد )…!!
( والساقية لسا مدورة ) 😥….!!
( ناجي القدسي ) دا لحن ( جسمي انتحل ) و ( الدبلة )
لي ( عركي) وأحلى منك ل ( حمد )
وسكة غير دربك تفتر……
ودنيا غير دنياك تودر…..
ياخ دا لحن( حمام الوادي ياراحل ) نفسها للعصفور ( حلنقي ) ….!!
بجانب ( أيقونته) ( الساقية )….!!
دي الحالة لاعب بي جينات ( أمو ) بس …!!
فأبوه ( يمني ) وأمه سودانية من ( عطبرة ) ….
ضربتو نسايما الحلوة …..فاطاحت بجبال ( صنعاء )
والقطار دور حديدو …!!
قدم الضياء …!!
فظلمته الدنيا …وهزمته الظنون …!!
وبجي يوم أحكي ليكم عنو وعن الحصل …!!
وعن بعد المسافة وقربها ….!!
ترجل النبيل …..وبقيت ساقيته تدور ….!!!😥
( حمد الريح ) يقف في الصف الأول مع فنانينا الكبار
تحرك في كل المربعات …وغنى للوطن والحب والجمال
اتحزم في ( عجبوني اللليله جو ….وارتقى ب ( مرية )
تجلي في ( أهل الهوى )….!!
وقد ﺭﺣﻠﻮﺍ ﻭﻣﺎ ﺗﺮﻛﻮﺍ ﺧﺒﺮ
و ( دقا ) نحاسو 🥁
في
( موسوم بالشجاعة فارس منو البرجاك
يا أسد الخلا ضربك صميم فتاك )
✊
تجول بين العاميه والفصحى وأجاد ….
فقد كان يعمل في مكتبة ( الجامعة ) ما اتاح له الفرصة لمزيد من الإطلاع والاقتراب أكثر من ( الكتب ) والجامعة تعج بالحوار الثقافي والمثقفين ……فمعظم أغنياته الأولى ( تخرجت ) من هناك
فقد استبق ( كاظم الساهر ) في استلهام أشعار
( العاشق ) ( نزار قباني )
وغنى ( حبيبيتي إن عاتبوك ) قبل ( كاظم ) بعقود
وتستهوينا عند ( حمد ) أكثر ..حتى إذا حشد ( القيصر ) الجيوش
وحبيبتي إن يسألونك عني يوما، فلا تفكري كثيرا
قولي لهم بكل كبرياء يحبني كثيرا ))
صغيرتي : إن عاتبوك يوماً
كيف قصصت شعرك الحريرا !؟!
قولي لهم: ((أنا قصصت شعري
لأن من أحبه يحبه قصيرا …
ونحن بنحبها عندك يا ( حمد الريح ) ونحترم ( الساهر ) ..
( حمد الريح ) شارك الكثيرين أفراحهم وكان نجم بيوت الأفراح….!! والمسارح …
يغني للناس …والعرائس..والحياة …🎉
و ( الحفلة بي حمد الريح ) ….!!
( وحليل ( حفلاتنا ) وكت الليل يجن ) 😥
لكننا سنردد معك أغنيتك ( الباهرة )
( الصباح الجديد )
( فقد خلقنا لننتظره )
وفى فجاج الردى قد دفنت الألم
ونثرت الدموع لرياح العدم
واتخذت الحياه معزفاً للنغم
اتغنى عليه فى رحاب الزمان
اسكنى ياجراح واسكتى ياشجون 😍
( حمد الريح ) معزوفة سودانيه حية …وفنان سوداني جميل …
غنى للأرض…والوطن والنيل
( والوطن محزون يا ود الريح ) 😥
تتقاذفه الأنواء ….وتضربه عاتيات الرياح
( والليلة ما عاد المراكب شرقن …!!!😥
…………..
صحي يا حمد ..!!؟
