الطيب عبدالماجد يكتب .. ( هدنة ) الجمعة يوميات علوب …!! ( ونعشق شمسها الحراقة ) 😍 بعانخي برس

( هدنة ) الجمعة

يوميات علوب …!!

( ونعشق شمسها الحراقة )

( السر ) دا صاحبنا ( هو ذاتو نازح) 😂
قال لي جاتنا في الحلة واحده أبوها أصلًا من ( الحلة ) لكن آخر زيارة ليهو كانت قبل سنوت وهي حلة صغيرة كدا وديعة ترقد على النيل

إسمها ( جلنار ) …!!

دا ( إسم ( البت ) ..!!
( أكيد ما الحلة ) 😂

( الحلة لو سموها ( جلنار ) كان نفضوها ) …!!

أول حاجه رجال الحلة الكبار ديل لمو ليك في ( أبوها )
دا كيييف يسمي ( بتو ) أسامي ( الشياطين ) دي …!!

( أجججججلد) 🏃🏃

( ضربة جزاء في الدقيقة الأولى )

و ( جلنار ) سابحة في ( براحاتها ) حاسه ليك بي إنها في كوكب آخر ….!!
( جوازها ) 📘راح والإ كانت الآن في ( المالديف )

تلبس ليهم في ( المنفوش ) و ( المدفوش ) وتجي حايمة قايلا نفسها في ( السلام روتانا ) 🧥

النسوان الكبار ديل يحدرن ساااي إلا ( كاتمات )

وكت لقت مافي ( كومينتات ) استغفرت وخشت في ( عباية )

في البداية كانت بتتأمل …🤔بعد شوية بقت ( تتململ)
😬 أخيراً وصلت مرحلة ( التنمل ) 😵‍💫

ودي مرحلة بعيدة …يصلها الراسخون …بتصلا بعد مسااافة كدا ….!!
الزول بكون فيها خدران ومنمل
( ما بشعر بي حاجة )

تشيل وتتأفأف …😤 ما راكبه ليها القصة دي …!!
أسعد لحظاتها لما الشبكة تجي ….بتركب ( موبايلها ) دا
وتسافر …!!🚀
( ويا مسافر بعيد غاب ساب الحبايب )

( الجسد في ( الحلة ) والروح في ( مانيلا )

عايزة تصحى الصباح من غير إزعاج تاخد ( الشاور ) 🛁بتاعا ….وتفطر بحبات الذرة و ( الشوفان ) مع الحليب قليل الدسم ورقائق القرفة ..

تتنقل في ( الأسافير )

وتتمسح …!!

( تلاته يوم بقنعوا فيها إنو ( الحمام ) دا مشترك ) …

المهم البني آدم شوية شوية بتأقلم …خاصة إذا في أمل

( عشان كدا الأمل مهم ..😍من غيرو بتطش )

تقوم من الصباح (واقي الشمس ) دا أهما شيئ

( الشمس ميته من الضحك ) 🌝 😂

( ونعشق شمسها الحراقة ونحن البينا حب وصداقة )

والنضارات قدر ( الطشت ) ….😎
بنات الحلة سموها ( الست ) …!!

في إشارة لي ( أم كلثوم ) 😂😂

( قاسيات ياخ ) 😂

طبعاً ( عدة الشغل ) دي الوحيدة الما نستها …
قايلا الحرب دي عشرة يوم ..!!

مشت لي دكان الحلة إسمو عمك ( الحسن ) معاها بت خالتا ( إزدهار ) قالت ليه
عايزين ( تونة ) خالية من الزئبق وتكون ( لايت ) …!!

( أداها ( مربة) ….!!

وطردم الاتنين ….!!!

شفع الحلة بقيادة واحد إسمو ( طلحة )
( ذكرني الكجم )
معاهو إتنين مساخيت كدا
معحبين جدا بي ( جلنار ) دي …
ديل طبعا بدخلو أي بيت وفي أي وقت على حس أطفالنا أكبادنا تمشي على الارض وطيور الجنة والقصص دي ..!؟

والله كان طيور ما بعرف ….!!
( عبد الباقي ) المعاهم دا بقطع البحر عوم

( هسا دي طيرة ) ..؟؟

يشيلو ويعاينو ليها وهى ذاتا بتحب ( الأطفال ) مهتمية بيهم كدا …وهم كاتلين ضلهم ياكلو معاها في البسكويت
مدعين البراءة …ويضاحكو ….ماخلو بسكويتة ..

( هي جلنار دي الكدايس بتحبها خلي الاطفال ) 😻

شافت ليها ( كديسة ) بتاوق بالحيطة 😾الساعة الغمتت ليك العيون 🤩 ومدو القدوم ….🫢ومسكت قلبها دايرة تموت …😌

قالت ( إتز سووو ( كيوت ) 😻

وهي البلد كلها مشركة للكديسة دي بالذات
قالو بتآكل الحمام …!!

( عارفنها بالاسم )

غايتو ( الكديسة ) كان سمعت ( كيوت ) دي كان اعتزلت الحمام دا …😸

( طلحة ) دا سألها قال ليها ( اللجام ) دا شنو ..!؟؟

( في إشارة لي تقويم الأسنان ( الدارعا ) البت دي 🤐
كلو ! صواميل ) 🔩 معاها ( لمعة ) 💫كدا ..

قالت ليهو دا عشان ( الأسنان ) حبيبي …!!

صاحبو المعاهو دا قال ليها بعد تقلعي أدينا ليهو ….!!😳

( بجازفو أي حاجه ديل )

و( طلحة ) مما ولدوهو أول مره زول يقول ليه (حبيبي )🥰
داير ( يتشقا ) النص …🥴

‏( جلنار يا نبع الحنان ) 😍

عندهم ( كنار ) كدا جاي من البحر بعومو فيهو الشفع ديل …..اليوم داك نطا من الكبري فوووق …ودقا المويةً
🙌 معاها ( هوبة ) …تعبيرا عن سعادته بي ( حبيبي ) دي ….!!

والله لو في إعلام واهتمام الود دا مكانو الأولمبياد

دي الحالة قالت دايرا تعلمهم الرسم

( والله ديل تتابعيهم يرسمو ليك ليك ( قتيل )

بتتونس معاهم قالت ليهم يا سلااااام بالجد أحلي حاجه هنا العصافير دي …يا الله ……!!
يا بختكم غايتو إنتو محظوظين شديد محاطين بالعصافير …

المعاهم التالت دا إسمو ( عروة ) قال ليها
نجيب ليك واحد ..!!؟؟ 😎 …!!

قالت ليهو ياريت 💞🫶

(( غايتو لو شافت ( النبلة ) الفي جيبو دي كان جاها انهيار عصبي ….!!))

الحمد الله نسى الموضوع ….!

أها يازول في الشهر التاني ( الخامات ) دي كلها قطعت
لا بتجيبا طيارة ولا ( أون لاين ) بالخسارة

أها بمجرد نفاد المخزون زولتك بقت تفتش في ( البدايل )

عماتا ديل نصحوها بزيت ( الكركار ) للشعر …
أدوهو ليهو دايره ( تستفرغ ) …..!!
قالت دا لو تموت ما بتهبشو …!!😷

وكت دخلت في الشهر التالت ….!!
هبشتو ….!!

( خجلت قالت يعني هو ريحتو ما كعبة شديد ) 😂

( تاني بتجي ) ؟؟

بعد شوية دخلت ليك في حاجات بنات أهلها ديل
كلها مكونات طبيعيه ..!!

ما شجعها على ذلك شايفاهن ليك ( نايراااات ) يلمعن
👋 👋 ( سماحة البنات )

سماحة جد …!! 🥰

هي ذاتا مستغربة 😅 قايلا في فرع هنا لي ( Dior )

ما عارفة هنا في ( فريع ) البان البسوح نديان
ومنو يااا سلام 👏…..سلم ✊✊

غايتو في واحدة اسمها ( بدرية ) كان لحقت لما ( نزحت ) الخرطوم … بندخل مرحلة النووي 💣

( طولها كنخلاتهم ….ولونها كقمحاتهم …ووجهها كالقمر ) 🥰😍

مش بقول ليك البت دي تشبه القمره ..أها ياها ( بدرية ) دي ….
وخلقة الله مغسلة وشها دا ومارقة …
وقايمة نار حمرا 🔥

( جلنار ) شافتا لما رجعت ورا …..!!
( هي قايلا السودان دا حدو ( برج الفاتح ) ..!!

ما شافت السحاب القبلي ..🥰

والمهيرة مهيرة السرور انتي الملكه وحرس انجليز حكومة …يا عروسنا عريسك غلبو الثبات

وكانت النتائج مبهره …يمين لما اتكيفت من روحا …!!

هسا ياها ديك قالت تاني ما راجعة …
وناويه تطور المنتج للتسويق …!!

( هي اصلاً كانت بتقرا صيدلة في ( مامون حميدة )

هنا لاقت مامون وحميدة ذاتم ..!!
( عمها ( مامون ) وخالها ( حميدة ) …!!

ود عمها لذيذ كدا إسمو ( الحاج ) قال ليها سميهو
( كركار جلنار ) 😂😂

( الحاج بكون قفل على ( الدامة ) دي ♦️) 😜

وناس الحلة بقو بقولو ليها ( ست الدار ) …!!
تتشارك معهم الأنشطة والمهمات ….وبكثافة …!!
وبتقيس الضغط للنسوان الكبار ديل كلهم
وتراجع تناول الأدوية ….وتوقيتاتها …

( جلنار ) بدت في إعداد زيت ( الكركار ) للتعبئة
قالت للحاج يجيب ليها ( ماء الورد )للتخفيف والمعالجة داير يقع من الضحك …قال ليها
( ماء الورد خلى ….!! جازفي لينا ماء الشرب )

أبوها قال ليها برافو يا ( جيجي ) أنا فخور بيك …!
( طوالي زغردت )

( فاهمة موضوع الزغرودة غلط ) 😂

لكن ماشة كويس ….!

زول إسمو ( جلنار ) وبرضو يدلعو بي ( جيجي )
( عجوه معطونة في عسل )

يا حليلك يا طلحة
أبوهو بقول ليهو ( المُر )

( الحاج ) بدا التسويق

(( ومع كركار جلنار وداعاً للتساقط والشعر المستعار ))
ونار يا حبيبي نار

المهم لازم نستمر في أحلامنا وآمالنا..ونشتغل أي حاجة
ونكتشف بلدنا وحاجاتا …وإننا حنكون أفضل وأحسن …!!
وهذا ما سيحدث بإذن الله ..

( ما ننتظر الحرب لمن تقيف ….!!
نقيف نحنا ….!! عشان البلد لما تجي تلقانا واقفين ) 🙌

( جلنار ) بقت تتأمل في الفرص المتاحة والفرص الممكن تتصنع
وكان أكثر ما يدهشها إنو مخزون ( مستلزماتها ) قطع
لكن لم يقطع مخزون ( الأكل والشراب ) هنا في هذا المكان
( المبروك ) ولم يتأثر رغم حشد الوافدين …!!

إنها بركات الأرض ونوايا الناس ….!!
رحمة الله ومدد السماء …!!🤲

السودان كان ولازال وسيظل جميل بي ناسو وأهلو وطبيعتو
وطيبتو …..وغني بي ثرواتو
ما حننسى حاجاتو ( السمحة ) عشان الناس ( الكعبة ) ..

لن نستسلم للظنون ولن نقسو عليه وسنظل ننتظره على شرفات المدائن..وعتبات البيوت 🙌

ولابتغرينا قصور من نور…
ولابسحرنا حرير مضفور…
نحن طلبنا الكلمه الطيبه…
وزي ما الدنيا تدور

( حندور ) 😇

إن بعد الطلقةً( رفقة )🌹
وان بعد الدانة نور

صحى يا ستو …!!؟؟؟؟

ندعو الله انو ( عروة ) ما يتذكر موضوع العصفورة