الطيب عبدالماجد يكتب …(أبو آمنه حامد ) _ ( ماغيرت ريدتو السنين وما بدل إحساسو الزمن )_ بعانخي برس
بعانخي برس
(أبو آمنه حامد )
( ماغيرت ريدتو السنين
وما بدل إحساسو الزمن ) 💞
( أمير الشرق ) و ( ترجمان البجا ) …
حوّل صلابة ( هيا ) إلى ( صبابة هوى ) فانداح فينا سيل من جمال …!!
( وسال من شعرها الذهب )..!!
( أبو امنه حامد ) ( برناردشو) السودان …وساحر الأزمان
كان فاهماً وساخراً وفنان
…
دخل كلية الشرطة وتخرج برتبة الملازم ذهب للتعامل مع مظاهرات شعبيه فشارك المتظاهرين في سابقة نادرة ..وترك الشرطة …!!
عمل ملحقا ثقافيا في سفارتنا بالقاهرة هجرها وذهب لدراسة الإعلام في جامعتها …!!
لقد كان متمرداً على كل شيء….!!
لايجيد تزييف الحديث ووضع المساحيق لذلك
جاءت قصائده صادقة وعفوية ونبيلة …!!
فالرجل يمتلك ( كاريزما ) خاصة تجبرك على الإنصات
ومفردات ( نادرة ) تحسك على إحترامه …!!
فقد كان شاعراً موهوب …ومبدعاً صريح …
كتب بالعاميه والفصحى وفي كل أفاض
حيث صدح الكبير ( ود البادية ) برائعته
( سال من شعرها الذهب وتدلي وما انسكب )
فمنحها ( إبن البادية ) روحاً وصورة فراينا ( الشَعر ) يتدلى
و ( الشِعر ) يتجلى
وقد مارس فيها ( صلاح بن البادية ) طلعاته الجويه التي لا يعرفها إلا هو …..!!
فحلقنا معه …..وتدفق ( أبو آمنة )
( ونحن شلناك في المقال وجلسنا على اللهب )…
( وكلاهما نار ) 🔥
لم يكتف بهذا اللقاء الذهبي مع ( صلاح ) فنثر فينا العبير
عبر أغنية ( فاح شذاها )
تسلطن فيها ود البدايه …!! و ( أبو آمنة) ( نضم )
ووشوشنى العبير فانتشيت ….
وساقنى الهوى فما أبيت
يد الحرير ارتعشت بكفىّ بكيت
من رعشتها بكيت
صبية … العطر يشتهيها
أمذنب أنا إذا اشتهيت؟ 🙌
( نقول شنو هسا ) …؟؟
رياح شرقية عكسية ….وأمطار غزيرة متوقعة في أجزاء واسعة من السودان ….!! وفيضان مشاعر 🥰
( أبو آمنة حامد ) الشعر عنده هبة …وتجليات
عشان كدا أدار لقاء القمة بكفاءة يحسد عليها ..
ونثر ( درره ) فأخذ منها ( وردي ) ( وأبو اللمين ) كل بمقدار …!!
وديل لما يغنو الإتنين لشاعر واحد ..فاعلم أن الأمر جلل
وأنه قد تفوق على نفسه
حيث التقي ( أبو آمنه) مع وردي في ( فرحة )
🎶
وبين الريد والهوى عشنا أيامنا سوى
ما قاسينا النّوى
ما أحلاك يا هوى …الهم راح وإنطوى
عش ريدتنا استوى
بين إيديهُ هنايا ….في عينيهُ منايا
حققنا أحلامنا
والعاشق عقبالو 😍
أغنية ( بتنطط ) فرح …
بسوقا ( الفرعون ) زي السايق مركب تتهادى بين الأمواج …ونحن نتهادى معه
والعاشق عقبالو …🙌
وتجدد اللقاء مع ( وردي ) في ( بنحب من بلدنا ) ….
ليخرج ( ود حامد ) من ( هيا ) ويحتل كل السودان عطراً ومزاج …..!!
متغزلاً في ( بت بلدي ) السمحة بره وجوه ….😍
وفتح المعابر الشرقيه لتصدير كل شيئ من خيرات بلادي
عدا ( المشاعر ) ( قفل ليها المينا )
فرغم ثرائها الكبير وقابليتها للتصدير لكن هناك في الداخل ما يستحق ….!!
🎶
وبنحب من بلدنا ما برّه البلد
سودانيّة تهوَى عاشق ود بلد
ويمضي مسترسلاً في غزله العفيف ….
في عيونا المفاتن شئ ما ليهُ حد
التّوب المهبهب فوق أم الضّفائر
والخد المعطّر زي أحلى الأزاهر
والخطوة الأنيقة ترنيمة مشاعر
أنا بيك كل عمري بمشيلها وبسافر
مين في الدّنيا ديَّ أجمل من بناتن
الليهن قلوبنا 💞 والفيهن صفاتنا
الكامنات بروحنا والعايشات في ذاتنا 🙏
( أبو آمنة أغدق …وهن بستاهلن…!!
لتكتمل القمة في لقاءه ( الدافئ ) مع ( المعلم ) (محمد الأمين) في أغنية ( ناعمة ) وضع فيها ( أدروب ) السيف في الجفير وأخرج لنا ورداً وحرير …!! 🙏
في شاعرية فذه …وتصوير بديع يجعلك منبهراً بهذا ( الساخر ) الساحر الرقيق الذي جاءنا بنسج الأماني
ويحمل القمر ..
وجانا الخبر شايلو النسيم
فى الليل يوشوش فى الخمايل
هش الزهر بكت الورود
وسالت مشاعر الناس جداول 🥰
وأبو اللمين بعرف وين ( ببركن ) ….!!
ولمن يغني
🎶
وإنت ما بهجة مشاعر
إنت ما رحلة عبير
وإنت ماياكا الأمير ….
( أمير إنتا دا والله يا أبو آمنه …. البتقول كلام زي دا )
وماغيرت ريدتو السنين
ومابدل إحساسو الزمن …🥰🙏
.اتحفتنا يا ( بعاتي ) ….
( أبو آمنة حامد ) شاعر استثنائي ….في حديثة طلاوة وفي شعره حلاوة ….!!
بعيد ومتمكن ….وأساسي …
لما يحكي كدا إنت ذاتك بتستمتع ..!!
لأنه صادق ومتصالح مع نفسه والآخرين….بملامح سودانية صميمة وعيون تشع طيبة وذكاء وجسد نحيل يحمل قلباً كبير 🥰
السخرية عنده هبة إلهية لا يدعيها ولكنها عميقة
وصادقة وتدعو للتأمل…!!
والكوميديا لديه طبيعية مترفة تصلك زاهية في غير تكلف …
مره سألوهو عن حياته في ( هيا ) …
قال …كنت راعياً لغنم الحلة في (هيا ) والآن أرعى غنم إبليس في ( الخرطوم ) 😂😂
قالو ليهو والجابك شنو ..!!
قال ليهم ..جابتني شقاوتي.. !!😂😂
لا قعدتا مع ( الهدندوة ) بقيت سعيد.. لا لقيت ( سعية ) في الخرطوم ….😂😂😂
( غايتو حظنا نحنا اللقيناك راعي للجمال
وساعي البريد الكلو حب ..ومليان ريد 🥰💞
التقي مع ( الجابري ) في ( ما نسيناك )
ودا لقاء ( ودود ) ومن نوع خاص …!!🫶
فالجابري يتدفق ( حنية ) وأبو آمنة يفيض (عذوبة ) فكانت أغنيه من رحيق ….!!
🎶
ومانسيناك جاي تعمل إيه معانا
بعد ما بدلتنا
وماسقيناك أحلي ما في عمرنا
من عواطف ومالقيناك
وجاي تعمل تاني أيه؟
( يازول البركة في جيتك إنت دا يا أبو آمنة حتى تكتب لنا بهذا البذوغ والجمال ) …
والرهيف قلبو بيعيش في شكو أكتر من يقينو
تستبيهو نظرة جارحة وتحترق بالحب سنينو
سيبو مرة يغسل احزانو بالأمل يشرق صباحو
وكيف يطير لعشو عصفور منكسر ….💔 مكسور جناحو ….!!
( شوف النيران دي ) 🔥
وعزز دفاعاته مع ( الجابري ) في أغنيه تانيه حلوه ومره
وليه كدا …..الظلم دا
مكتوب علي وعلي أنا
في حبي ليك هجر وضنا
ودي الجابري بعذبا عذاب ….لمن تبكي ..!!
ولييييه كدا ….الظلم دا 🎶
التقى مع ( صالح الضي ) سكناً وعشرة في القاهرة أثناء إقامتهما هناك وكتب أبو آمنة لصالح عدداً من الأغنيات الخالدة وكانت (نحنا ما ناسك) واحدة من هذه التجليات
🎶
وما نااااسك نحنا ماااا ناسك
ولو بتلقى زول بحبك زيّنا
زول بشيلك في ( عيونو ) وفي ( ضلوعو )
وفي ( دموعو ) …
( التلاته يا أبو آمنه ….!!؟ ما عصرتا علينا ) …؟؟؟
والله إنت ذاتك زولنا وحبة بندولنا …منحتنا فرح وأهديتنا
زهور
إلتقى ( أبو آمنه ) مع ( المبهج ) سيد خليفة في
(جاري وأنا جارو )
( وريد ( بت الجيران ) دا كلامو برا …!!
(جنبك ومشتهيك يا عيون ) 😍
فانداح ( أبو آمنه ) وأعلن الحب وفتح بيت البكا
وقلبي العاشق وافي
ما قادر إتخلى
أجمل بت في فريقنا
شوقي الزاد ما قلا
يا بت أنا ود الحلة وعاشق وحياة الله
جاري وانا جاااارو ….🎶🎶🎶
كتبها ابو آمنه بمزاج وغناها ( الحوت ) بالاستلاف وكعادته عبر بها إلى الضفة الأخرى
فسمعناها بإحساس ( سيد ) وشفناها بعيون ( الجان ) …!!
فزادت حلاوة على حلاوتها …!!
وما أجمل بت الجيران 🥰
تتسابق ( النخب ) للجلوس الى ( أبو آمنة حامد )
علها تحظى بطاقة وحب …!!
فالرجل كحامل المسك إما أن ( يحذيك ) وإما أن تجد منه ريحاً طيبة …
وقد كان كذلك …..جذلاً …ممتعاً …وأخاذ ..!
( ساخر ) في غير تكلف …و ( ساحر ) حد الإبهار
( وناس ) درجة اللطافة …..!! 🥰 ومضحك حد الإرتواء …
وهلالابي مرضان ….!!
قيل إنه اكتشف مرة أن أحد أبنائه يشجع ( المريخ، ) فناداه وأمسك بيده حتى باب المنزل الخارجي وفتح الباب وقال ليهو …!!
( أمشي لي ( شاخور ) أنا ما بربي لي مريخابي) 😂😂
يحبه أهل الهلال ويحترمه المريخاب وهذه لا تحدث إلا لذي حظ عظيم … وقد فعلها أبو آمنة فقط لانه صادق مع نفسه والآخرين …وهذه لعمري كفيلة بأن تمنحك تقديراً وتكريم …وفي كل حين …!!
أظن دائماً أن ( أبو آمنة حامد ) عالم ساحر لم نكمل دخوله بعد فللرجل قصائد تنضح عطراً وزهور …وكتابات تضوع اريجاً وبلور …وفوق كل ذلك شخصية سودانية صميمة ومثقف مترف …سجل اسمه باحرف من نور ….
وكتب تاريخاً ومضى ….
عاش فقيراً ومات فقيراً ….لكنه بالغ الثراء في العفة والإلفة والشعور ….غني النفس والهوى ..ومكتنز الروح والجوى …
كان شاعراً باذخاً وعظيم …ومتحدثاً عميقا وكبير
وأديباً سلساً ومتدفق …. !! نحن بنبادلو المحبة
وإنت ما بهجة مشاعر
وانت ما ياكا الأمير …!!
صحي يا ( كاهن )..!!؟ 😍🙌
