ودعتك الله يا يمه
*********************
يا أمي
رسالة شوق
برسلة ليك من قلبي
عشان بتحسي بي همي
بدور يا يمه اشرح ليك
واحكي حكايتي من أول
من صغري
عشان عارفك بتهديني
وتوريني
وعارف انو من طبعك
انك انت يا يمه
جمل شيلي
وصباح خيري
بصرح ليك يا أمي
بريدو ابوي
وأريد اهلي
وبرضو كمان
بريد اخواني واخواتي
اتربينا في حضنك
امان وسلام
وعشك كان فرع أخضر
ملان حنية
مليان ود
لما نوم
بنرقد في سرير واحد
ونحلم بي حلم واحد
ونتنفس نفس واحد
كانت لمة يايمه
ريد ومحبة يا يمة
كبرنا خلاص
اتفرقنا
ضاعت مننا اللمة
فقدنا الود
فقدنا الريدة يا يمة
ما بنلقاها
الا ساعة اللمه
نتونس
ونتذكر حكاوي زمان
زمن خوتنا نحن صغار
زمن ما كانت الخوة
في جوه القلب ساكنة
ولما نفارق اللمة
ننسى الريدة والخوة
ما عارف سببنا شنو!!!
يمكن زحمة الدنيا
دي حال الدنيا
صرنا فروع
فروع مخضرة يايمة
ملانة زهور
فروعك اثمرت يمة
ملانة ثمار
ثمارك حلوه يايمة
ثمارك دايرة تتلم
عشان ما ترجع الاول
زي ما كان
كلو جمال
وكلو حنان
دي دايره قلب
ملان تحنان
الا الشايفو يا يمة
بقينا بعاد
قلوبنا قست على الاحباب
دا صار الحال
بنتسابق على الدنيا
كل واحد فرز كومو
وماهاميهو في غيرو
بشوف حالو
مره ومره بتذكر
ويحاول يرجع الأول
وما برجع
يحاول مرة بي بسمة
ومر ومرة بي كلمة
الا الرجعة ما بتبقى
الا قلوبنا تتصافى
ونتعافى
ولكن بي قلب صافي
ننسى صغائر الدنيا
ونرجع بي قلب صافي
عشان ما نرجع الخوة
ودعتك الله يا أمي
الله معاك
عليك الرحمة من ربي
واخر شي
برسل ليك كل مرة
عشان عارفك بتهديني
وتوصيني
وعارفك دارية بي حالي
ودعتك الله يايمة.
**************
….صديق…..
