مهندس سامي صلاح يكتب .. دكتور ياسر شبارقة أو النسخة الثالثة من الانتهازية معدلة ــ بعانخي برس

واد مدني مدينة الجمال و الشفافية.
مدينة تحب من بحبها وتتجاوز كل انتهازي بلغة العظماء بصمت!!!
دكتور ميرغني سيف النصر تولي إدارة مستشفي الكلي
ونهض بها وفي الوقت الذي توقفت خدمة المشافي في السودان كله
ولصوص الجنجويد يتحكمون ويحكمون المدن التي سقطت تحت سيطرة بؤسهم.
ظلت مستشفي الكلي تعمل مرة بعون ومرة بغيره
تتسول الجاز لين استدانة
ظلت تعمل
أين كان شبارقة
نزح إلي القضارف بحث عن رزق.
مع العلم إنه ما نطق ولا سأل ولا تظلم من كونه ليس علي رأس الإدارة
وعند التحرير ارتدي ذي عسكري وما ايسر الهندام وادعي إنه في الصفوف الامامية
ثم هدأت المدينة وتلمست الشفاء
وبدأ شبارقة يلمع نفسه في منصب يناسب دوره الجهادي تماهي مع الراهن.
ولم تسمع له كلمة
فخرج يخاطب مجلس السيادة والوالي ولاول مرة تنحني جبهة المهنية لتطالب بكرسي اداري وهو مدير مستشفي الكلي.
وبكي واستبكي وابكي الحرائر في ظلم خيالي ولم يترك رداحة ولا مناحة إلا استدعي صوت نحيبها
وسالت من هو موثوق من وزارة الصحة
لماذا لا تعطوي الناحب مراده
ويبدوا إن الوزارة لها تحفظاتها عليه كطبيب وادارى.
وللأسف لم تنفع ولم تشفع البدلة العسكرية ولا المؤهل ولا الخدمة الطويلة له
ثم عاد وسلط كل لسان له نحو دكتور ميرغني
وذكر إنه استقال ويتلقي المرتب شهري
مع العلم إن المرتب الأساسي المزعوم ستة وخمسون الف. لا غير.
وهو أي شبارقة يعرف ذلك
ولكن الصفة الملازمة دائما للانتهازي الغباء والغباء مع سبق الاصرار والترصد.
قضية شبارقة مع وزارة الصحة وحتي الوزارة لها رؤية في من يكون مدير
احيانا يكون الرأي إن الشخص بلا كاريزما كأنه خيال مآته ومثل هذا عليه إن يرضي بالقسمة والنصيب
أي إنه خيال فقط.
دعاوي شبارقة إنه يريد البداية في برنامج زراعة الكلي
والسؤال هل يظن شبارقة إنه سوف يزرع فتريتا أو موسم برسيم.
مع العلم إنه طبيب باطني
وفكرة برنامج زراعة الكلي تحتاج لزمان ومكان غير هذا.
وتحضيرات ولوجست لا تتوفر
والدعاية للذات لا تعني المخاطرة بحياة المرضي
حتي يا شبارقة مسألة التلويح بمن إنك تستطيع السفر للخليج كخبرة وتلاقي أوضاع ومرتب اعلي
إلا إنك بقيت بتخدم في أهلك.
ما عندها معني.
سافر ياخي وربك يسهل
مالك ياخي
بس إحزر من الامارات الناس ديل بيكرهوا الكاكي
ونحن ما عندنا معاهم ود
أها لو صنفوك كوز تبقي مشكلة
أها لو ركبت الموجة صاح أحسن ليك مع الخليج تبقي جاهزية.
بالنسبة لدكتور ميرغني سيف النصر
الناس في مدني بتحبوا محبة شديدة
وبلغة الحبوبات عندو شام الريد
والكلام ده اكتسبوا بالعطا الصامت
يعني بيخدم في اهلو من غير اذية ومن
والحاجة دي من الله يعني محبة الناس ما يلبسوا ليها كاكي.
ياخي الناس بتقيم براها
منو البخدم ومنو بتاع الدعاية.
وبعدين ريدة واحترام ناس الكاكي ده براهو ما شفت التقدير والاحترام لمن استشهد ذي محمد صديق ولا الحئ ذي الفريق نصر الدين
ولا ذي ود مدني قزافي.
ناس كدة قدمت اخلاص منقطع النظير.
ده كوم.
وكوم تآني ذي دكتور محمد الامين ود طابت
أو دكتور ميرغني سيف النصر ود مدني
دحين ما تلخبط الكيمان
أها لو سافرت للخليج
ح يسألك الناس عن الخبرة والشهادات ما عن كاكي يومين.
ياخي احزنت الناس وهم يشاهدون طبيب انتهازي
وقد تعودنا علي سمسار انتهازي. عاطل انتهازي فاشل انتهازي
عليك الله ورسول الله احترم المهنة دي
ياخي القاع مزدحم جدا جدا
ما فينا مساحة لمزيد من الاحباط.
الشبارقة منطقة مباركة أنجبت وسوف تنجب وفي الخاطر المرحوم دكتور سر الختم رحمه الله
يا الشبارقة صحي البطن بطرانة