قصيدة جديدة للشاعر صديق احمد يوسف _ كان عشمي _ بعانخي برس

كان عشمي
تسر خاطر
وتفتح للمودة قلب
وتفرش للمحبة زهور
وتتفاءل
وتفرح بي بشارة الخير
لما تطل عليك… تسعد
وتنشر للبجيك بسمات
عشان يفرح
ويحس بالرحمة
في عينيك
يقرب ليك
يدوم الود
وسارع لي دروب الخير
عشان الخير بجيب الخير
ونور للمحبة درب
عشان تمتد
وقابل خوتك فرحان
وافرد لي جناحك …مد
وما تبخل
ما تصر وش
وما تزعل اخوك…تندم
ما تزيد هم كمان بي هم
عشان الخوة ما بتهون
علي الاخوان
وخير الدنيا ما بكمل
ولما تبيض النية
بزيد خيرك
ما تبخل وما تصر وش
كمان رزق الله عندو سبب
يمكن رزقك الجاييك
عشان اهلك
عشان اولادك الحلوين
الله بوزع الارزاق
وامكن عند اخوك رزق
مع رزقك زيادة خير
احفظ رزقو بتنيل خير
ويوسع ليك انت رزق
وارجع تاني لي عشمي
وافتح للمودة درب
وافرش للمحنة زهور
واتذكر بدايتي قبيل
وصيتي اليك…
سر خاطر
عشان الخوة ما تنهد
وطعم الدنيا يبقى فرح
دا كان عشمي.
***********
….صديق….

B