قالوا الموضوع اخد لفة ولفة ونضم كتير وممكن يكون زعل ناس وبفرح ناس، ودخل في الدقداق وخج بيت الكلاوي كمان.
معالي رئيس مجلس الوزراء د. كامل ادريس يصدر القرار رقم (١٣٩) الخاص بانشاء وحدة بري مشروع الجزيرة ووزير الزراعة والري ينفذ القرار بتشكيل لجنة كبيرة للتنسيق و وضع الأسس و الضوابط لعمل الوحدة بجانب عمل الري “، برئاسة وكيل الري ومحافظ المشروع نائبا له واخرين و دا الكلام الجاب الكلام ،،،
الموية من ابعشرين للحواشة، يعني الري عليهو ضخ الموية من المصدر (الخزان) في الميجر والترع الفرعية بس، والباقي تموت بيهو ادارة المشروع والمزارعين، ورسوم الموية تمشي عدل للري “وزارة المالية والاقتصاد الاستراتيجي” قالوا لانها هي بتجيب الكراكات وتطهر الترع من الاطماء والحشائش وتقيف فوق القناطر والبوابات وديل ادارة المشروع ما عندها خبرة فيهن ولا عندها مهندسين وفنيين مهرة يقومون بذلك.
ويظهر العملية واللفة الطويلة دي لانو كل جهة عايزة تجر براها.. وعايزة تقول انا سيداااا
وزي دااا بودينا لي كلمة “صراع مهني” حتي ولو قالوا مافي صراع الناس حتقول في ونص وخمسة كمان لانو بقي واضح.. الري ما راضي علي ادارة المشروع والادارة ماراضية علي الري، “المابيك بحدر ليك في الضلام” والمزارع عايز موية والموية عند السلطان..
والموسم الصيفي ودع والشتوي يلوح قال انا جاي،، وكل فيهم واحد جاري الحبل عليهو.. قلنا حينقطع ونقع كلنا في الواطة دي.. بس متين نعرف البصلحنا من البضرنا… مش عارف والله.. العالم ماشي لي قدام ونحنا ساقيتنا لسه مدورااا.. لسه مدورا..
(خمة نفس)
عودة الحياة لمركز مدني علاج وجراحة القلب بودمدني ولاية الجزيرة (وسط السودان) بعد التخريب الممنهج الذي احدثته المليشيا المتمردة ابان استباحتها للولاية يعد انجازا كبيرا ويؤكد بان حكومة الولاية برئاسة أ. الطاهر ابراهيم الخير جادة في العمل وعرفت وين تخت رجلها…مبروك
(خمة نفس)
ادارة تنظيم الاسواق بودمدني والضابط الاداري أ. حسن دنقس وفريق عمله جعلوا من السوق ساحة واسعة “تمشي تتضرع وتقدل كمان” منع الفريشة والدرداقات.. ياريت يستمر الوضع علي كدي.. نحنا عارفين في ناس ماراضين لكن صحة المواطن خط احمر كما قال والي الجزيرة.
