🌴أستاذة صابرة مدبرة🌴
🍂🍂🍂
يا سيدسو هوووووي
حتنومي كيف
لما الفصول راكوبة او كرنك عشر
حاحايا ساي ما فيش صريف
لما الفصل سبورة بس تحت الشجر
و الطوب جلوس عيل نحيف
مافيش كتاب لا محبرة
مافيش قلم لا مسطرة
تعليمنا للأسف الأسيف
الساقية ماها مدورة
طبشيرة سبورة و ضليل
استاذة صابرة مدبرة
كانت تفتش عن شليل
حنية ود و مثابرة
كل همها الغبش الصغار
فيها الدموع متحجرة
معطونة بي أدب الوقار
بيها الجموع مستبشرة
لا كرسي لا مقعد مريح
رغم الألم متصبرة
مجبورة طول اليوم تقيف
هذي المعلمة لم تزل
مخضرة في الزمن المحل
إنسانة سامية لسان عفيف
🥀🥀🥀
و نحن كان تعليمنا كيف
قرينا باالمجان سنين
كدينا من عرق الغلابة الكادحين
و علينا دين
دين العديم
حق اليتيم
حق الأرامل يا حصيف
لما الطفولة الناضرة
تسكن في الخوير
تقدح من الغدو للعصير
تتوسد الهم و الرصيف
أكلنا كان
في الجامعة ضان
باسطة و حليب
اكلنا ما لذ و يطيب
نتشهى و الشي العجيب
الأمة كانت ماكلة نيم
شان إنت تنجح يا هميم
و ترفع معاك مليون ضعيف
زول للصبر صاحب حميم
و ليه الفقر أصدق حليف
أرهقنا بالدين الوطن
الكان جنازة بلا كفن
مرمية بين أدغال و قيف
🍂🍂🍂🍂
يا عزة كملت السفر
لي الليلي ما لقيتلك و صيف
و الله لو صفت النفوس
لو شلنا في الحدق الوطن
و طفينا نار حرب البسوس
غسلنا بالنيل الحزن
اودعنا لي سيدسو الفلوس
حنغير الحال المخيف
يسري العلم في كل ربوع
لا زول فقير
لا زول يجوع
سودانا يصبح مستنير
جامعاتنا بين فرقان و ريف
أسراب عنادل الشوق تعود
لي دوحة الظل الوريف
و بلدنا بالخيرات تجود
محتاج يشيل ميسور يضيف
🌾🌾🌾🌾
في الدنيي كم
كمين نعال أمونة
أو طرقي انهرن
في الدنيي كم عم عبده
راغب في التياب
و الحال حرن
الدنيي آخره كوم تراب
و الدنيا إنت عليها ضيف
ما سمعت بي بله الخفير
الكان بمر زي النسيم
من لطفه صار الطف لطيف
كان زول عديم بايت القوى
و الدنيا ما بتدي الحريف
مصرانو بالجوع التوى
لكنه متعفف عفيف
ما باع كرامته عشان دواء
ما إتخبا ما قطع الطريق
لا سوى عيب
لا شق جيب
مرت سنين ما فك ريق
حاشاه ما إتسول رغيف
يتمنى بي الأمل البصيص
يلقالو بكرة فطور رخيص
كمشة عدس و الوصلة نيف
لو مرة صحانا الضمير
حاج بله جانا غشانا طيف
طاف زارنا في التلت الأخير
كان حلمة في النوم الخفيف
سألنا أنفقتوا العفو؟
زي ما أمر سيدي الشريف
هاجرتوا طولتوا الغياب
أحلامكو كلها زيف و زيف
هل مرة كافلت اليتيم
أنفقت من جرفك جريف
في اللحظة ديك
يا بله جد احتجت ليك
أذعنت ليك
و ما بقيت ضعيف
مديت معابر شوقي ليك
فتحت لي قلبي الكفيف
🍂🍂🍂🍂
يا خلي كيف
في دنيتك
مليون وليمة تشبعك
كم من مصائب تبلعك
كمين أفاعي بتلدغك
و تسوق خطاها بدون حفيف
في دنيتك إنت السمك
لو تنجا من خشم القرش
و تتحلا من نصب الشبك
حتلاقي سنارة و شرك
تدعو و تحلك يا لطيف
يا خلي قد صار الوطن
جبانة هايصة نزيف نزيف
صه يا كنار صه يا ولد
في حضرتك ضاع البلد
كأنك إنت لا بتسمع و لا بتشيف
🏝🏝🏝🏝
هيا يا شباب هيا للأمام
قد ولى عهد الدسدسة
مدنية كاملة هي المرام
لا جنجويد لا بلبسة
حذاري أن وطنك يضام
حرق الوطن لازم يقيف
ناس قاسية لا حس لا قلب
تقتل تكبر و تغتصب
يتبرأ الدين الحنيف
يا عزة الدوام في البال
عذرا إذا احتدم القتال
و صابك من نبالنا وبال
و غور في فؤادك سيف
عيون عزة
مزن برق الفويطر الشال
قليبه لهيف
دموع زي طرفة بكاية
كأنه طريفة الف طريف
🌷د.بابكر البشير خليفة🌷
🍂Bogbor Regis🍂
5/12/2025
